Berkarar döwletiň täze eýýamynyň Galkynyşy döwründe “Döwlet adam üçindir!” diýen taglymatdan ugur alnyp, giň möçberli işler durmuşa geçirilýär. Hormatly Prezidentimiziň baştutanlygynda halkymyzyň maddy hal-ýagdaýyny gowulandyrmakda, saglygyny goramakda we berkitmekde netijeli tagallalar edilýär. Bu meselede alnyp barylýan tutumly işler ýokarda ýatlanan taglymatyň il-gün bähbitli aladalarynda öz beýanyny tapýandygyna şaýatlyk edýär.  Raýat jemgyýetimizde döwlet   Baştutanymyzyň tagallalary bilen ýaş nesillerimiziň saglygyny goramakda örän uly alada edilýär. Bu wezipe geljekde sagdyn, ruhubelent, berk bedenli ýaş nesli kemala getirmek bilen aýrylmaz baglydyr. Şonuň üçinem hormatly Prezidentimiz bu meselä hemişe üns berýär. Ýurdumyzyň dürli künjeginde, şol sanda “Awaza” milli syýahatçylyk zolagynda hereket edýän «Daýanç» çagalar sagaldyş we dynç alyş merkezi ýokarda ýatlanymyza aýdyň subutnamadyr. Häzirki wagtda  döwrebap çagalar sagaldyş we dynç alyş merkezlerinde çagalaryň ýüzlerçesi saglyklaryny dikeldip, wagtlaryny gyzykly geçirýärler. Aýjemal RAHMANIÝAZOWA.

Ýurdumyzda ýaş nesillerimiziň ukyp-başarnygyny ýüze çykarmakda taýsyz tagallalar edilýär. Ajaýyp zamanamyzyň goýnunda önüp-ösüp, bagtly çagalygyň hözirini görüp ýaşaýan ýaş nesillerimiziň yhlasly okamagy, bilim almagy üçin giň mümkinçilikler döredilýär. Şeýle mümkinçiliklerden peýdalanyp, geljekde Watanymyzyň abraý-mertebesiniň arşa göterilmegi üçin bar yhlasyny gaýgyrmajak zehinli ýaşlarymyzyň biri hem Mamajan Hommadowadyr. Mamajan şu ýyl Sakarçäge etrabyndaky takyk we tebigy ugurlara ýöriteleşdirilen 43-nji orta mekdebi üstünlikli tamamlady.  Ol orta  mekdebi oňat bahalar bilen okady we himiýa, biologiýa dersleri bilen içgin gyzyklandy. Mamajan kiçilikden ejesiniň hünärini dowam etdirmegi isläp, lukman bolmagy arzuw edýär. Şol maksat bilen ol himiýa, biologiýa dersleri bilen baglanyşykly dürli kitaplary okamagy, adam anatomiýasyny içgin öwrenmegi gowy görýär.  Maksada okgunly Mamajan mekdep ýyllarynda okuwçylaryň, arasynda geçirilýän ders bäsleşiklerine, şeýle-de, internet olimpiadalaryna gatnaşyp, baýrakly orunlary eýelemegi başardy. Mundan başga-da, Mamajan Hommadowa “Boýdäne ösümliginiň antidiabetiki täsiri” atly tema boýunça “Altyn asyryň altyn zehinleri” atly bäsleşigiň çäginde mekdep okuwçylarynyň arasynda geçirilen taslama bäsleşigine gatnaşyp, onuň welaýat tapgyrynda 1-nji, döwlet tapgyrynda bolsa 2-nji orunlary eýelemegi başardy. Şeýle hem M. Hommadowa “Pähim-paýhas ummany Magtymguly Pyragy” ýylynda Türkmenistanyň Oguz han adyndaky Inžener-tehnologiýalar uniwersitetinde ýurdumyzyň orta mekdepleriniň ýokary synp okuwçylarynyň arasynda himiýa dersinden geçirilen bäsleşikde 2-nji orna, şu ýyl ýokarda ady agzalan ýokary okuw jaýy tarapyndan ýurdumyzyň ýaşlarynyň arasynda guralan Innowasion tehnologiýalaryň bäsleşiginde 1-nji  orna hem-de altyn medala we ýene şol uniwersitetiň “Boýdäne ösümliginiň antidiabetiki täsiri” atly taslama bäsleşiginde höweslendiriji baýraga hem-de orta mekdepleriň okuwçylarynyň arasynda geçirilen “Oba hojalyk ylmy: geljek ýaşlaryň elinde” atly ylmy bäsleşikde 2-nji orna mynasyp boldy.  Mamajan jigimiziň geljekde uly abraýyň eýesi bolup, ata Watanymyzyň ösüşine özüniň şahsy goşandyny goşjakdygyna berk ynanýarys. Gadamyň batly, ýoluň ak bolsun, Mamajan! Sülgün ŞADYÝEWA.

Beýik Ýüpek ýolunyň iň oňat goralan gadymy merkezi hökmünde ÝUNESKO-nyň Bütindünýä mirasynyň sanawyna girizildi. Bu Merkezi Aziýanyň iň gadymy şäheridir. Bir wagtlar Margiananyň we türkmenleriň Seljuklar döwletiniň paýtagtydy. Şeýle hem meşhur akyldarlar Omar Haýýam, As-Samani we beýlekiler bu ýerde ýaşap geçipdirler we işläpdirler. Harabalyklaryň arasynda bäş sany gadymy oturymly ýerler bolup, olara – Erkgala, Gäwürgala, Soltangala, Abdulhan galasy we Baýramalyhan galasy degişlidir. Olaryň köpüsi weýran bolýar, käbiri diňe toýun depeler bolup galýar. Gazuw-agtaryş işleri wagtynda tapylan arheologiki tapyndylary Merwiň taryhy muzeýinde görmek bolýar.

Sulhum alyp, obamyzda bir gyza, Hyrydar bakýaryn ilden ogrynça. Duşuşamda göwnüm intizar gyza, Sözleşýär gözleri ilden ogrynça. Garlawajyň ganaty deý gaşlary, Boýy boýma, ýaşyma deň ýaşlary, Ýel degse bölünýän gara saçlary, Dyza düşýär inçe bilden ogrynça. Diýdim men söýýärin jan bilen tenden, Bir jogap almadym şirin dilinden, Özi welin açyk penjiresinden, Geçsem bakyp galýar ýoldan ogrynça. Bir gün säher “altyn” ýygýan mahalym, Sözüme söz goşdy arzyly gülüm, Ömrümde ýadymdan çykmaz şol salym, Dodagyndan öpdüm dilden ogrynça. Aman ANNAMYRADOW.

Gadymyýete siňip giden baý taryhly, özboluşly gözelligi bilen görenleri haýran edýän Bathyz türkmen tebigatynyň ýedi hazynasynyň biridir. Geliň munyň şeýledigine suratlandyrmalaryň üsti bilen göz ýetirjek bolalyň. Deňiz derejesinden 1200 m. belentde, Bathyzyň günbatar tarapynda Köpetdagyň gündogar, belkide Gindikuş daglarynyň Gissar gerşiniň iň soňky günbatar şahasy bolan Gezgädik il arasynda Gyzgädik diýip atlandyrylýan gerşiniň, Bathyzyň merkezinde bolsa deňiz derejesinden 311 m. ýokarda Ýeroýlanduz çöketliginiň ýerleşmegi, iň belent nokady bilen iň pes nokadynyň ara tapawudynyň 900 m. bolmagy bu ýeriň ösümlik we haýwanat dünýäsiniň, toprak örtüginiň, ýer üstüniň dürli görnüşliligi bilen tapawutlanyp, içki wertikal guşaklygyň alamatlarynyň bardygyny ýüze çykarýar.  Çöllüklerden dag etegine, dag eteginden pes daglyklara geçip gidýändigi mese-mälim göze görünýär. Megerem, şonuň üçin bu ýerde düwürtikli asjagaz, Çernowyň ýylan şekilli suwulgany, horosan hažžygy, uzyn aýakly as,  Guşgy çigildemi ýaly başga ýerde duş gelmeýän endemik görnüşleriň ýaýramagyna tebigy şertler dörändir.  Gezgädik- Gyzgädik gerşini mel, hek çökündileri düzýän bolsa, dag etegindäki çil-çil bolup, başlary bir bolup ýaýylyp açylyp gidýän gerişleri Tetis deňziniň düýbi bolan gyzyl reňkli toýunsöw çökündiler, geologiki taýdan has gadymyýet çökündileri bolan paleogen çökündileri bilen utgaşýar. Deňiz derejesinden 311 m. ýokarda, daş töwerekden 600 m. pesde ýerleşýän Ýeroýlanduz çöketligiň ýer üstüni gurşap alýan geologiki jynslar welin ertekilerdäki ýaly örän täsin. Iň pes ýerini dürli reňkler bilen öwüşgin atýan duzly köl örtýär. Onuň daş-töweregini Tetis deňziniň düýbünde ýaşap daşa öwrülen dürli görnüşli balykgulaklar, daşa öwrülen ösümlikleriň we agaçlaryň galyndylary ýaýrandyr. Bu ýerden tapylan arhiologiki gymmatlyklary goraghananyň merkezinde ýerleşýän müzeýde  ýakyndan synlamaga şertler döredilen. Şol duzly kölüň daş töweregini ýarym aý şekilli Tetis deňziniň düýbünde atylyp bilmän galan wulkaniki jynslardan ybarat bolan beýikligi 30-40 m. ýetýän diňleri bolup, duzly köle kölege salýar. Ýeroýlanduz çöketliginiň gündogar bölegini şorlar eýeleýär. Şor bilen duzly köli bolsa duzly ýap birleşdirýär. Duzly ýap wulkaniki jynslaryň üstünden akyp geçýändigi sebäpli onuň suwy ýylyň dowamynda ýylydyr. Duzly ýabyň suwunyň ýene-de bir tapawutly tarapy, onuň suwynyň üstki gatlagy sowuk bolup, aşaky gatlagynyň bolsa jana ýakymly mylaýymdan-da gyzgyn suwynyň saklanýanlygydyr. Ýeroýlanduz çöketliginiň demirazyk tarapyny beýikligi 15-20 m. gyzyl gaýalar ýarym aý görnüşinde gurşaýarlar. Bu gaýalaryň toýnakly haýwanlar bolan türkmen dag goçlary, keýikler hat-da ýyrtyjylar üçin ähmiýeti örän ulydyr. Olara gyşyň aýazyndan, tomusyň yssy jöwzasyndan goranmaga şertleri döredýär. Ýeroýlanduzyň günorta – gündogar, günorta – günbatar ugurlaryny çöle mahsus bolan çöl ösümlikleri, çerkezdir – gandym, ekzotiki görnüşli çomüçdyr – porsy gamaklar gözüňi gamaşdyrýar täsinligi döredýär.              Geliň Bathyz belentliginiň iň pes ýeri bolan Ýeroýlanduz çöketliginden Gyzgädik gerşine çenli toprak örtügine syýahat edeliň. Iň pesde şorluklar.Onda-da üsti gaýmakly şorluklar. Gaýmakly şorlüklar tomusyň jokrama yssysyndan gurap nahar duzyna öwrülýär. Geçmişde ýüpek ýolundan geçýän kerwenler Merwe, Hyrada, Eýrany şäherlerine  nahar duzuny çekilenlgi barada maglumatlar bar.           Ýeroýlanduzda Türkmenistanyň iň günortasynda ýerleşýän çäge massiwi bar. Diýmek bu ýerde çöl-çäge topragy ýaýrandyr. Ýeroýlanduzdan 600 m. deňiz derejesinden ýokaryk düzlüge, baýyrlyklara çykarsyň welin, ähli ýerini mele toprak örtýär. Mele topragam düzümindäki çägäniň, toýunyň we çüýrüntginiň mukdaryna görä görnüşlere bolünip, bu ýerde baý ösümlik dünýäsini emele getirýär. Şonuň ýaly hem ýer üstüniň keşbiniň biri pisse tokaýlygydyr. Ýurdumyzyň tebigatynyň täsinliklerini, ösümlik we haýwanat dünýäsini öwrenmek örän gyzyklydyr, gorap saklamak her birimiziň mukaddes borjumyzdyr.                                                                                                    Çaryýarguly AKYNYÝAZOW.

Hormatly Prezidentimiziň parasatly ýolbaşçylygynda ýurdumyzda dünýä ülňülerine laýyk gurlan şypahanalarda raýatlarymyzyň saglygyny berkitmekde uly işler amala aşyrylýar. Diýarymyzda giňden tanalýan şypahanalaryň biri-de Baýramaly şypahanasydyr. Berkarar döwletiň täze eýýamynyň galkynyşy döwründe Baýramaly şypahanasy iň bir gelim – gidimli melhemler mekanynyň birine öwrüldi. Häzirki wagtda bu şypahanada raýatlarymyzyň sekiz ýüze golaýy dynç alýar we öz saglyklaryny berkitýärler. Şypahananyň gür baglyga, gül-gülzarlyga beslenip oturmagy bu ýere gelýän raýatlarymyzyň ruhuny has-da belende göterýär. Tomus paslynyň dowam edýän günlerinde töwerege görk berip oturan gür baglar bu ýerde saglygyny berkidýän adamlara oňaýly täsirini ýetirýär. Bu şypahana özüniň tebigat aýratynlygy, arassa howasy we gün şöhlesiniň iň köp düşýän ýeri hökmünde beýleki şypahanalardan aýratyn tapawutlanýar. Bu şypahanada her möwsümde ýurdumyzyň dürli künjeklerinden gelýän bagtyýar raýatlarymyz sapaly dynç alyp, öz saglyklaryny dikeldýärler. Şypahana gelýän adamlar eli ýeňil lukmanlar, şepagat uýalary we beýleki hyzmat ediş bölümleriň işgärleri tarapyndan güler ýüz bilen garşylanýar. Şypahanada adamlaryň dynç almagy üçin ähli şertler döredilip, bu ýerde dynç alýanlaryň saglygyny dikeltmekde iň kämil tehnologiýaly bejeriş enjamlary ulanylýar. Şypahanada elektrofarez, lazer bejergi, dürli görnüşli galwaniki toklar, stat duşy ýaly fizio bejergiler, mundan başga-da owkalamagyň dürli görnüşleri raýatlara lukmanlaryň görkezmesi esasynda bellenilýär. Bu bolsa raýatlarymyzyň saglyklaryny berkitmäge uly ýardam berýär. Bu ýerde oturdylan döwrebap lukmançylyk enjamlar adam bedeniniň duz, ýag, suw, iýmit çalşygyny we gan aýlanyşygyny, böwrek, ýürek, gan – damar hem-de merkezi nerw ulgamlaryny, daýanç hereketlerini sazlaşykly kadalaşdyrmaga kömek edýär. Mineral wannalar üçin şypahananyň çäginden 870 metr çuňlukdaky dik guýudan çykýan hlorid – natriý mineral suwy ulanylýar. Bu ýerde ynsan saglygyny duzly we ýodly howa bilen bejerýän ýöriteleşdirilen otaglar hem bar. Döwrebap şypahanada ynsan saglygyny günüň şöhlesiniň täsiri astynda bejeriş usullary bolsa onuň esasy aýratynlygydyr. Bu ýeri gün wannasy diýlip atlandyrylýar. Lukmanlaryň görkezmelerine laýyklykda gün wannasynda bir wagtda elli adam bejergi alyp bilýär. Lukmanlar bu usulyň böwrek – peşew ýollaryny bejermekde uly ähmiýetiniň bardygyny aýdýarlar. Şypahananyň sport zalynda dynç alýan raýatlary sport enjamlarynyň kömegi arkaly bejermek usullary hem peýdaly usullaryň biri hasaplanylýar. Dynç alynýan otaglaryň tämiz we arassa saklanylmagy, olarda zerur bolan enjamlaryň goýulmagy dynç alýanlaryň göwnüni göterýär. Şypahananyň giň we döwrebap naharhanasynda bolsa dynç alýanlara tagamlaryň, ýokumly işdäaçarlaryň, süýji – naz nygmatlaryň dürli görnüşleri hödürlenip, olaryň kadaly naharlanmagy üpjün edilýär. Şypahananyň döwrebap çaýhanasy hem hemişe köp adamly. Bu ýerde Gahryman Arkadagymyzyň “Türkmenistanyň dermanlyk ösümlikleri” atly ylmy kitabyndaky dermanlyk ösümliklerden melhem çaýlaryň dürli görnüşleri taýýarlanylyp bu ýere gelýänlere hödür edilýär. Döwrebap şypahanada dynç alýan adamlar medeniýet öýünde geçirilýän gyzykly medeni çärelere, aýdym – sazly çykyşlara tomaşa etmekden hem ruhy lezzet alýarlar. Welaýatyň medeniýet we sungat işgärleri özleriniň döwrümize mynasyp çykyşlary bilen dynç alýanlary begendirip durýarlar. Şypahanada dynç alýan adamlar üçin “Gadymy Merw” döwlet taryhy – medeni goraghanasynyň çägindäki ýadygärliklere gyzykly gezelençler hem yzygiderli guralyp durulýar. Şypahanada saglyklaryny berkitýän bagtyýar raýatlarymyz özlerine döredilýän şeýle ajaýyp mümkünçilikler üçin türkmen halkynyň Milli Lideri Gahryman Arkadagymyza we Hormatly Prezidentimiz Arkadagly Gahryman Serdarymyza  alkyş sözlerini aýdýarlar.

Türkmenistanyň Magtymguly adyndaky Ýaşlar guramasynyň Mary welaýat geňeşiniň, Mary welaýat kitaphanasynyň bilelikde gurnamaklarynda tegelek stoluň başynda söhbetdeşlik geçirildi. Mary welaýat kitaphanasynda geçirlen bu söhbetdeşlige Türkmenistanyň Mejlisiniň deputatlary, welaýatyň habar beriş serişdeleriniň wekilleri, Ýaşlar guramasynyň welaýat, etrap, şäher geňeşleriniň işgärleri we kitaphanaçylar gatnaşdy. Bu ýerde ,,Halkara parahatçylyk we ynanyşmak” ýylynyň şanly wakalary we şu ýylyň awgust aýynda Awazada geçiriljek BMG-nyň deňze çykalgasy bolmadyk ösüp barýan ýurtlar boýunça 3-nji halkara maslahatyna hem-de ýurt Bitaraplygymyzyň şanly 30 ýyllyk baýramyna görülýän taýýarlyk işleri bilen bagly gyzykly söhbetler edildi. Söhbetdeşlige gatnaşanlar parahat ýurdumyzda erkana ýaşaýşy üpjün edýän türkmen halkynyň milli Lideri Gahryman Arkadagymyza we Hormatly Prezidentimiz, Arkadagly Gahryman Serdarymyza alkyş sözlerini aýtdylar. 

Mary welaýatyň Wekilbazar etrabynyň çäginde ýerleşýän Türkmenistanyň Senagatçylar we telekeçiler birleşmesiniň agzasy bolan “Gök derek” hojalyk jemgýeti 2013-nji ýylda esaslandyrylan, öz öndürýän ýokary hilli önümleri bilen içerki bazarda öz ornuny tapan öňdebaryjy kärhanadyr. Türkmenistanyň ykdysadyýetiniň senagat ugurly ösmegine goşant goşmaklygy aýdyň maksat edinýän şu telekeçilik kärhanasy agaç önümlerini, pol örtüklerini, agaç gaplamalaryny, jaýlaryň gurluşygynda ulanylýan beýleki önümleri, şeýle hem agaçdan ýasalýan ýokary hilli öý esbaplaryny we mebelleri öndürýär. Kärhana häzirki zamanyň ýokary tehnologiýaly enjamlary bilen üpjün edilip, dünýäniň öňdebaryjy tejribeleri esasynda dolandyrylýar. Onuň önümçilik bölümleirniň Germaniýanyň, Şwesiýanyň agaç işläp bejerýän iň täze enjamlary bilen enjamlaşdyrylandygyny aýtmak gerek. Kärhananyň önümçiliginde ulanylýan çig mal – dürli görnüşli agaçlar Russiýa Federasiýasyndan gelip gowuşýar. Bu ýerde çig mal ilki bilen ýokary ekologiýa ülňülerine laýyklykda saýlanylyp alynýar. Soňra agaç ýörite guradyjy kameralarda howa çyglylygyndan saplanyp, gaýtadan işlemäge taýýar görnüşe getirilýär. Agaç mehaniki taýdan işlenilip, oňa ýalpyldawuk we çyzgyly görnüşler berilýär. Önümçilikde millilik bilen utgaşdyrylan hojalyk maksatly mebel dizaýnlary, gap – gaçlar hili hem harytlyk görnüşi boýunça sungat eseri derejesine ýetirilýär. “Gök derek” hojalyk jemgýetiniň işgärleri daşary ýurtlarda, şol sanda Şwesiýada ýörite okuwlary geçip gelen hünärmenlerdir. Şeýlelikde olar kämil tehnologiýaly enjamlara ussatlyk bilen erk edýärler. Kärhananyň telekeçileri geljekde agaç gyryndylaryny gaýtadan işläp, gurluşykda giňden ulanylýan önümleri öndürmekligi meýilleşdirýärler. Kärhananyň öndürýän ýokary hilli önümleri hojalyk jemgyýetiniň welaýatyň ak bazarlaryndaky ýöriteleşdirilen dukanlary arkaly alyjylara ýetirilýär. Hünärmenleriňdir işçileriň altmyşdan köpräginiň zähmet çekýän ýeri bolan bu hojalyk jemgyýetinde ýurdumyzyň gurluşyk kärhanalaryndan gelip gowuşýan buýurmalar esasynda-da ýokary hilli agaç we agaç önümleri öndürilýär. Täzelikde kärhanada Awaza milli syýahatçylyk zolagynda gurulýan medeni we dynç alyş merkezleri üçin buýurmalar boýunça öndürilen pol örtükleriniň, agaç gaplamalarynyň uly tapgyry ugradyldy. “Gök derek” hojalyk jemgýetiniň işgärleri milli ykdysadyýetimiziň hususy pudagyna döwletimiz tarapyndan döredilýän giň şertler üçin türkmen halkynyň Milli Lideri Gahryman Arkadagymyza, Hormatly Prezidentimiz Arkadagly Gahryman Serdarymyza alkyş sözlerini aýdýarlar.

Ýakynda Mary şäherindäki “Merw” futbol meýdançasynda Türkmenistanyň Futbol federasiýasynyň hem-de “Merw” bedenterbiýe-sport futbol klubynyň bilelikde guramagynda 2015-2016-njy ýyllarda doglan ýetginjekleriň arasynda futbol boýunça ýaryş geçirildi. “Merw” bedenterbiýe-sport futbol klubynyň kubogyny almak ugrunda guralan ýaryşda futbolçy türgenler özleriniň ukyp-başarnygyny görkezdiler. Mary, Aşgabat, Baýramaly şäherleriniň hem-de Türkmenbaşy şäherçesiniň “Merw”, “Wepaly ýigitler”, “Altyn Täç”, “Soltan Sanjar”,  “Şapak”,  “Gres” futbol toparlarynyň duşuşmagynda geçirilen ýaryş çekeleşikli häsiýete eýe boldy. Baýramaly şäheriniň “Soltan Sanjar” futbol topary 3-nji, Aşgabat şäheriniň “Altyn Täç” futbol topary 2-nji, Mary şäheriniň “Merw” futbol topary 1-nji orunlara mynasyp boldular. “Merw” “Altyn Täji” 5:3 hasabynda utmagy başardy we esasy baýraga – Kuboga mynasyp boldy. Sülgün ŞADYÝEWA.

Türkmenistanyň Magtymguly adyndaky Ýaşlar guramasynyň Mary welaýat geňeşiniň, Mary welaýat kitaphanasynyň bilelikde gurnamaklarynda tegelek stoluň başynda söhbetdeşlik geçirildi. Mary welaýat kitaphanasynda geçirlen bu söhbetdeşlige Türkmenistanyň Mejlisiniň deputatlary, welaýatyň habar beriş serişdeleriniň wekilleri, Ýaşlar guramasynyň welaýat, etrap, şäher geňeşleriniň işgärleri we kitaphanaçylar gatnaşdy. Bu ýerde ,,Halkara parahatçylyk we ynanyşmak” ýylynyň şanly wakalary we şu ýylyň awgust aýynda Awazada geçiriljek BMG-nyň deňze çykalgasy bolmadyk ösüp barýan ýurtlar boýunça 3-nji halkara maslahatyna hem-de ýurt Bitaraplygymyzyň şanly 30 ýyllyk baýramyna görülýän taýýarlyk işleri bilen bagly gyzykly söhbetler edildi. Söhbetdeşlige gatnaşanlar parahat ýurdumyzda erkana ýaşaýşy üpjün edýän türkmen halkynyň milli Lideri Gahryman Arkadagymyza we Hormatly Prezidentimiz, Arkadagly Gahryman Serdarymyza alkyş sözlerini aýtdylar. 

Ýakynda Türkmenistanyň Magtymguly adyndaky Ýaşlar guramasynyň Mary welaýat Geňeşiniň guramagynda Mary welaýat tele radio studiýasynda tegelek stoluň başynda söhbetdeşlik geçirildi. Halkara parahatçylyk we ynanyşmak ýylynda gazanylýan üstünlikleri, Gahryman Arkadagymyzyň, Arkadagly Gahryman Serdarymyzyň beýik başlangyçlaryny halk köpçüligine ýetirmek maksady bilen geçirilen söhbetdeşlige Türkmenistanyň Mejlisiniň deputatlary gatnaşdylar. Söhbetdeşlikde Türkmenistanyň Mejlisiniň deputatlary çykyş edip, olar öz çykyşlarynda dürli ulgamlarda alnyp barylýan işler dogrusynda nygtap geçdiler. Has takygy, çykyş edenler Türkmenistanyň Mejlisiniň ýedinji çagyryşynyň dokuzynjy maslahatynda garalan meseleler, şol sanda ýurdumyzyň kanunçylygyny kämilleşdirmek ugrunda alnyp barylýan işler dogrusynda giňişleýin bellediler. Şeýle-de hemişelik Bitaraplygymyzyň 30 ýyllygynyň baýramyna, ýakyn günlerde “Awaza” milli syýahatçylyk zolagynda geçiriljek halkara maslahatyna görülýän taýýarlyk işleri hakynda aýdyldy. Bu taryhy senelerde ara alnyp maslahatlaşyljak möhüm meseleleriň geljekde döwletleriň arasyndaky işjeň gatnaşyklary has-da pugtalandyrjakdygy barada aýdylan täsirli gürrüňler söhbetdeşligiň içinden eriş-argaç bolup geçdi. Söhbetdeşlikde aýdylan her bir gymmatly maglumatlaryň ýurdumyzyň ösüşi babatynda uly ähmiýete eýedigini äşgär etdi. Täsirli bolan söhbetdeşligiň ahyrynda oňa gatnaşyp, çykyş edenler ýurdumyzyň ähli ulgamlarda uly ösüşlere eýe bolmagynda, milli kanunçylygymyzy has-da kämilleşdirmekde taýsyz tagallalary edýän Gahryman Arkadagymyza, Arkadagly Gahryman Serdarymyza çäksiz sagbolsunlaryny aýdyp, Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, beýik başlangyçlarynyň hemişe rowaçlyklara beslenmegini arzuwladylar. Maksat JANMYRADOW.

Berkarar döwletiň täze eýýamynyň Galkynyşy döwründe hormatly Prezidentimiziň başda durmagynda ýurdumyzyň halkara abraýy barha ýokarlanýar. Türkmen halkynyň Milli Lideri Gahryman Arkadagymyzyň beýik başlangyçlaryny mynasyp dowam edýän Arkadagly Gahryman Serdarymyzyň alyp barýan parasatly içeri hem daşary syýasatynyň netijesinde dünýä döwletleri bilen ykdysady hyzmatdaşlyk,   dost-doganlyk gatnaşyklary ýola goýulýar.  Ýadymyzda bolsa, 2025-nji ýylyň 11-nji aprelinde BMG-niň Baş Assambleýasynyň 79-njy sessiýasynyň 63-nji plenar mejlisinde «BMG-niň deňze çykalgasy bolmadyk ösüp barýan döwletler boýunça üçünji maslahatyny geçirmegiň tertibine goşmaça maglumat» atly Kararnamanyň biragyzdan kabul edilmegi ýurdumyzyň öňe sürýän başlangyçlarynyň dünýä bileleşigi tarapyndan ykrar edilýändiginiň we olaryň halkara giňişliginde uly ähmiýete eýediginiň nobatdaky beýanyna öwrüldi. Şunuň bilen baglylykda, üstümizdäki ýylyň awgust aýynda “Awaza” milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji halkara maslahatynyň geçirilmeginiň meýilleşdirilmegi ýokarda agzanlarymyza doly şaýatlyk edýär. Bu maslahatyň esasy maksady hem deňze çykalgasy bolmadyk ösüp barýan ýurtlaryň ykdysady mümkinçiliklerini artdyrmak, ulag we logistika ulgamlaryny, sebitara we halkara söwda gatnaşyklaryny ösdürmekden hem-de şol ýurtlaryň dünýä ykdysadyýetine doly derejede goşulyşmagyna ýardam bermekden ybarat bolup durýar. Şeýle hem maslahatda ulag geçelgeleri, serhetüsti söwda, energiýa üpjünçiligi, azyk howpsuzlygy, sanly ykdysadyýet we howanyň üýtgemegi ýaly, möhüm meseleler ara alnyp maslahatlaşylar. Forumyň çäklerinde syýasy-diplomatik, söwda-ykdysady, medeni-ynsanperwer ugurly köp sanly çäreleriň guralmagy hem göz öňünde tutulýar.  Halkara maslahatynyň Türkmenistan döwletimizde guralýandygy bilen baglylykda, şol döwürde Merkezi Aziýanyň her bir ýurdunyň “Awazada” öz milli gününi geçirip, özboluşly medeniýetini, sungatyny, milli tagamlaryny görkezmegi hem göz öňünde tutulýar. Bu halkara çäre Türkmenistanyň diňe bir sebitara hyzmatdaşlykda däl, eýsem, dünýä derejesindäki möhüm meseleleriň çözgüdinde hem işjeň hyzmatdaşlygyny görkezýär. Maksat JANMYRADOW.

Berkarar döwletiň täze eýýamynyň Galkynyşy döwrüniň ösüşlere beslenýän Halkara parahatçylyk we ynanyşmak ýylynda bolup geçýän özgertmeler döwlet durmuşynyň ähli ugurlarynyň täze döwrüň talabyna laýyk kämilleşdirilmegini şertlendirýär. Türkmenistanyň kanunçylyk binýadyny halkara kadalaryna laýyk getirmek we ýurdumyzyň ösüşlerini, ykdysady kuwwatyny kämil kanun esasynda berkitmek Arkadagly Gahryman Serdarymyzyň döwlet syýasatynyň esasy ugurlarynyň biri bolmagynda galýar. Hormatly Prezidentimiziň bu babatda öňde goýýan wezipelerinden ugur alnyp, Türkmenistanyň Mejlisiniň ýedinji çagyrylyşynyň şu ýylyň 28-nji iýunynda geçirilen dokuzynjy maslahatynda dürli ugurlara degişli kanunlary kämilleşdirmek boýunça birnäçe kanun taslamalary ara alnyp maslahatlaşyldy we kabul edildi. Maslahatda deputatlar ilki bilen «Türkmenistanyň Raýat kodeksiniň täze beýanyny tassyklamak we herekete girizmek hakynda» Türkmenistanyň Kanunynyň taslamasyny ara alyp maslahatlaşdylar. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, Arkadagly Gahryman Serdarymyzyň durmuşa geçirýän ynsanperwer syýasatyna laýyklykda amala aşyrylýan haýyr-sahawat işiniň kämil hukuk binýadyny emele getirmek maksady bilen, Raýat kodeksine haýyr-sahawat işi bilen baglanyşykly gatnaşyklary kadalaşdyrýan babyň we başga-da birnäçe üýtgetmeleriň girizilmegi aýratyn bellenilmäge mynasypdyr. Kodeksde ulanylýan adalgalara milli kanunçylygymyzyň tejribesine laýyklykda düşünjeler berildi we olaryň mazmuny doly açylyp görkezildi. Şonuň ýaly-da, Kodeksiň bölümleriniň we baplarynyň belgileri, maddalarynyň gurluşy «Hukuk namalary hakynda» Türkmenistanyň Kanunyna laýyklykda görkezildi hem-de Kodeksiň hereket edýän kadalary Türkmenistanyň Konstitusiýasy hereket edýän kanunlar bilen sazlaşykda döwrebaplaşdyryldy. Şeýle hem maslahatda başga-da birnäçe kanun taslamalaryna garaldy we kabul edildi. Türkmenistanda amal edilýän her bir iş döwletimiziň has-da kuwwatlanmagyna, halkymyzyň bagtyýar durmuşda ýaşamagyna gönükdirilendir. Bu işleriň özeninde bolsa, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, Arkadagly Gahryman Serdarymyzyň mähriban halkymyza, eziz Watanymyza bolan çäksiz söýgüsi durandyr. Garaşsyz, hemişelik Bitarap Türkmenistan döwletimizde milli kanunçylygymyzy kämilleşdirmekde giň mümkinçilikleri we şertleri döredip berýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, dünýä ähmiýetli alyp barýan işleriniň rowaç almagyny arzuw edýäris.   Orazdurdy ABDYÝEW.

Golaýda “Mary” myhmanhanasynyň mejlisler zalynda Türkmenistanyň Demokratik partiýasynyň welaýat, Mary şäher, Mary, Wekilbazar, Murgap etrap komitetleriniň bilelikde guramagynda “Ýaşasyn parahat durmuş!” atly maslahat geçirildi. Oňa welaýat, şäher, etrap halk maslahatlarynyň agzalary, TDP-niň welaýat, Mary şäher, Mary, Wekilbazar, Murgap etrap komitetleriniň işgärleri we işjeň agzalary gatnaşdylar. Maslahaty TDP-niň welaýat komitetiniň guramaçylyk we syýasy işler bölüminiň müdiri Myrat Ataýew açdy we alyp bardy. Maslahatda TDP-niň Mary şäher komitetiniň başlygy Hekimberdi Orazberdiýew, TDP-niň Wekilbazar etrap komitetiniň başlygy Tawus Gylyjowa, TDP-niň Ýolöten etrap komitetiniň partiýa guramaçysy Şasenem Röwşenowa, welaýat taryhy we ülkäni öwreniş muzeýiniň Murgap etrap şahamçasynyň ýolbaşçysy, TKA-nyň işjeň agzasy Sytdyh Rahmanow, Mary etrabyndaky 8-nji orta mekdebiň mugallymy, TDP-niň welaýat komitetiniň ýanyndaky wagyz-nesihat toparynyň agzasy Muhammetmyrat Allakulyýew, Mary şäheriniň merkezi şäher kitaphanasynyň kitaphanaçysy, TDP-niň welaýat komitetiniň ýanyndaky wagyz-nesihat toparynyň agzasy Maral Gulowa çykyş etdiler. Olar çykyşlarynda Garaşsyz, Bitarap Türkmenistan döwletimizde halkymyzyň asuda, abadan durmuşda bolelin ýaşamagy üçin döredilip berilýän mümkinçilikler barada giňişleýin gürrüň etdiler. Şeýle hem gözel Diýarymyzda hemişelik Bitaraplygymyzyň 30 ýyllygynyň baýramyny dabaraly bellemäge görülýän taýýarlyk dogrusynda nygtadylar. Maslahatyň ahyrynda bagtyýar türkmen halkyny nurana geljege alyp barýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, tutýan tutumly işleriniň rowaç bolmagy arzuw edildi. Şemşat SAÝLYÝEWA.

Türkmenistanyň Prezidentiniň durnukly ösüşi üpjün etmäge gönükdirilen daşary syýasatyny durmuşa geçirmek hem-de halkara we sebit derejesinde kabul edilen resminamalary iş ýüzünde amala aşyrmak, şeýle hem Birleşen Milletler Guramasy bilen hyzmatdaşlykda Deňze çykalgasy bolmadyk ösüp barýan ýurtlar boýunça üçünji maslahaty guramaçylykly geçirmek maksady bilen, Türkmenistanyň Prezidenti Karara gol çekdi. Resminama laýyklykda, 2025-nji ýylyň 4 — 8-nji awgusty aralygynda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan ýurtlar boýunça üçünji maslahatyny we ugurdaş çäreleri guramaçylykly hem-de ýokary derejede geçirmek bellenildi. (TDH)

Parahatçylyk we ynanyşmak adamzadyň abadan geljegini üpjün etmekde biri-biri bilen aýrylmaz baglanyşykly gymmatly düşünjelerdir. Şonuň üçinem hormatly Prezidentimiziň alyp barýan öňdengörüjilikli daşary syýasaty dünýäde parahatçylygy, ynanyşmagy we hyzmatdaşlygy pugtalandyrmagyň ýörelgesine eýerýändigi bilen adamzat jemgyýetçiliginde uly gyzyklanma döredýär. Türkmenistanyň başlangyjy bilen BMG-niň Baş Assambleýasynyň kabul eden Kararnamalarynyň üçüsi bilen ykrar edilen hemişelik Bitaraplygymyzyň taryhy ähmiýeti uludyr. Bitaraplygymyzyň 30 ýyllygynyň uly toýy Halkara parahatçylyk we ynanyşmak ýylynyň şanyna şan goşar. Garaşsyz döwletimiziň Bitaraplyk hukuk derejesinden ugur alyp öňe sürýän halkara ähmiýetli başlangyçlaram dünýä jemgyýetçiliginiň ünsüni özüne çekýär we içgin öwrenilýär. Mysal üçin, geçen ýylda Türkmenistanyň başlangyjy esasynda BMG-niň Baş Assambleýasy tarapyndan “2025-nji ýyl — Halkara parahatçylyk we ynanyşmak ýyly” hem-de “Merkezi Aziýa — parahatçylyk, ynanyşmak we hyzmatdaşlyk zolagy” atly Kararnamalaryň Milletler Bileleşigine agza döwletleriň biragyzdan goldamagynda kabul edilmegi möhüm waka boldy. Munuň özi ýurt Baştutanymyzyň parasatly daşary syýasatynyň rowaç alyp, uly goldawa eýe bolýandygyna aýdyň subutnamadyr.  Hormatly Prezidentimiziň hoşniýetli, parahatçylyksöýüjilikli daşary syýasat strategiýasy giň gerime eýe bolýar. Bütin dünýäde ählumumy howpsuzlygy berkidip, parahatçylykly gatnaşyklarda özara bähbitli hyzmatdaşlygy ösdürmäge ýardam edýär. Bu bolsa, durnukly ösüşi, abadançylygy, rahat durmuşy kepillendirýär. Laçyn KAKAJANOWA.

Türkmen halky hormatly  Prezidentimiziň baştutanlygynda Halkara parahatçylyk we ynanyşmak ýylymyzyň ýene bir guwançly senesi — hemişelik Bitaraplygymyzyň 30 ýyllygynyň toýuna taýýarlyk görýär. Bu senäniň ähmiýeti örän uludyr. Türkmen halky özüniň eşretli ertirki gününi, döwletli döwranyny baky Bitaraplygymyz bilen aýrylmaz baglanyşdyrýar. Sebäbi Garaşsyz, baky Bitarap Türkmenistanymyz bu günki günde parahatçylygyň we asudalygyň, agzybirligiň we jebisligiň ýurdy hökmünde bütin dünýäde tanalýar. Türkmen Bitaraplygynyň 30 ýyla golaý döwrüniň içinde ata Watanymyz tanalmaz derejede ösdi we özgerdi. Bilşimiz ýaly, ak şäherimiz Aşgabat sebitde ylalaşdyryjy merkeze öwrüldi. Arkadagly Gahryman Serdarymyzyň baştutanlygynda ýurdumyzda tutuş adamzadyň bähbidine hyzmat etjek oňyn teklipler yglan edilip, olar dünýä jemgyýetçiliginde uly goldawa eýe bolýar. Garaşsyz Türkmenistanymyzyň Bitaraplygynyň geçen 30 ýyla golaý döwründe ýurdumyzyň diňe bir daşary syýasatynda däl, eýsem, içeri syýasatynda-da, durmuş-ykdysady ösüşlerinde-de, medeni-ruhy gatnaşyklarynda-da beýik işler durmuşa geçirildi.  Ogulşeker DURDYÝEWA.

Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda Garaşsyz, Bitarap döwletimiz ösüş-özgerişleriň aýdyň ýoly bilen ynamly öňe barýar. Türkmen halkynyň Milli Lideri Gahryman Arkadagymyzyň Türkmenistan Watanymyzy çalt depginlerde ösdürmäge gönükdirilen beýik başlangyçlaryny üstünlikli dowam edýän   hormatly   Prezidentimiziň parasatly baştutanlygynda belent sepgitlere eýe bolunýar. Ýurdumyzy durmuş-ykdysady we medeni taýdan durnukly ösdürmekde uly üstünlikler gazanylýar. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň taýsyz tagallalary bilen mähriban Watanymyzyň gülläp ösmeginde giň möçberli işler durmuşa geçirilýär. Aşgabat — Türkmenabat ýokary tizlikli awtomobil ýolunyň gurluşygynda uly işler bitirildi we bitirilýär. Ilatyň saglygyny goramakda alnyp barlýan işler hem giň gerime eýe boldy.  Gahryman Arkadagymyzyň beýik başlangyçlaryndan gözbaşly döwlet ähmiýetli, il-gün bähbitli tutumly işleriň bady artýar. Şeýle işlere mysal edip, türkmen halkynyň Milli Lideri Gahryman Arkadagymyzyň başlangyjy bilen gurluşygynyň birinji tapgyry tamamlanan Arkadag şäherini ýatlasak ýakymlydyr. Gojaman Köpetdagyň ajaýyp dag   eteginde gurlup, birinji tapgyrynyň gurluşyk-gurnama işleri tamamlanan Arkadag şäheri nusgalyk şäherdigi bilen  dünýä doldy. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy esasynda gurluşygyna girişilen bu örän iri taslamany durmuşa geçirmegiň çäklerinde 2023-nji ýylyň iýun aýynda hormatly Prezidentimiziň gatnaşmagynda Arkadag şäheriniň birinji tapgyrynyň ulanylmaga berilmegi taryhy waka boldy.  Gahryman Arkadagymyz bu döwrebap şäheriň gurluşygyny hemişe üns merkezinde saklap, bu döwletli iş üstünlikli dowam etdirilýär. Şeýle tagallalaryň netijesinde, bu şäher  “akylly” şäher ady bilen meşhurlyga eýe boldy. Dogrusy, Arkadag şäheri maksatlaryň myrat bolýan jenneti mekanyna öwrüldi. Häzirki wagtda Arkadag şäheriniň gurluşygynyň ikinji tapgyry güýçli depginde dowam etdirilýär. Türkmen halkynyň Milli Lideri  Gahryman Arkadagymyzyň taýsyz tagallalary, egsilmez yhlasy netijesinde sanlyja ýyllarda kemala gelen bu döwrebap şäheriň  halkara sylaglarynyň ençemesine mynasyp bolmagy-da   Gahryman Arkadagymyzyň tagallalarynyň miwesidir. Türkmen halky ýokary zähmet üstünliklerine beslenip, şanly wakalary bilen şöhratlanýan Halkara parahatçylyk we ynanyşmak ýylynda tutanýerli zähmet çekýär. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň peder ýoluny dowam edýän Arkadagly Gahryman Serdarymyzyň baştutanlygynda Garaşsyz, baky Bitarap döwletimiz ynamly gadamlar bilen aýdyň geljegine barýar. Baýram AMANOW.

Bahar paslynyň ajaýyp gözelligi

Fotoreportaj: Futbol boýunça Türkmenistanyñ çempionaty 12-nji tapgyr Altyn Asyr - Merw

Fotoreportaj: Futbol boýunça Türkmenistanyñ çempionaty Merw 1-1 Altyn Asyr

Fotoreportaž: Mary welaýaty: Çagalary goramagyň halkara güni mynasybetli geçirilen dabaralardan pursatlar

Fotoreportaž: Mary welaýatynda Bütindünýä welosiped güni bellenilip geçildi.

Fotoreportaž: Mary welaýaty: Türkmenistanyň ÝUNESKO agzalygyna kabul edilmeginiň 30 ýyllygyna bagyşlanan dabaralardan pursatlar.

Fotoreportaj: DÇ-2026 saýlama tapgyry Türkmenistan 0-1 Eýran yslam respublikasy

Fotoreportaj: Mary şäheriniň Çagalar çeperçilik mekdebiniň okuwçylarynyň işleri