Asudalyk tapýar göwnüň,  Gara gazmany diňläňde.  Diňletmeýär asla böwrüň, Gara gazmany diňläňde. Bendi boldy bütin dünýä,  Mukamlary bagryň dilýär,  Taryplanyňa müň degýär, Gara gazmany diňläňde. Babagammaryň ýasany,  Köňül-köşkleň bossany,  Ýoklar gaýgydyr gussaňy,  Gara gazmany diňläňde. Jadylaýjy kakuwyndan,  Şirin-şeker mukamyndan,  Ganyp bolmaz owazyndan, Gara gazmany diňläňde. Orazgözel AMANOWA.

Bedew batly at-myradyň mekany, Ýollaryň ak bolsun, Türkmenistanym! Joşgunly kalplaryň şirin mukamy, Ýollaryň ak bolsun, Türkmenistanym! Diýarymda at agnasa toý bolýar, Türkmenime döwletlilik ýar bolýar, Watan waspy goşa tarda ýaňlanýar, Ýollaryň ak bolsun, Türkmenistanym! Dost-dogany garşy alýar ilimiz, Bagta sary uzap barýar ýolumyz, Şöhrata beslenip gelýär ýylymyz, Ýollaryň ak bolsun, Türkmenistanym! Guwan, halkym, guwan, Serdar ogluňa, Hakyň nury siňen peder dogmuna, Ýeňişler ýarandyr oguz kowmuna, Ýollaryň ak bolsun, Türkmenistanym! Maral BERDIMYRADOWA.

Guwan, joş, gülle, Watan!  Ösüşlerňe sarpa bar. Öz halkyna howandar,  Parasatly Arkadag. Ýüzümize syldyran,  Bu gün mähribanlary.  Tirsegine galdyran, Beýik gahrymanlary. Bitaraplyk mekany, Watanym ösýär öňe. Buýsanjymyz artdyrýar, Her gün, her şanly sene. Şöhrat-şanyň beýgelýär, Ýyllar ýyllardan aşyp. Gül ülkäni wasp edýär, Şahyr ýüregi joşup. Muhammetjuma HYDYROW.  

Hawa, tomus paslynyň gelmegi bilen dynç alyş merkezleri güýçli depginde herekete başlady. Mekdep okuwçylary, talyplardyr mugallymlar — umuman ähli ildeşlerimiz tomus paslynyň ajaýyp günlerini, sapaly hem şypaly geçirmek üçin ýurdumyzyň dürli künjeginde hereket edýän sagaldyş we dynç alyş merkezlerine, şypahanalara gidýärler. Ynsan saglygyny dikeltmekde ähli mümkinçilikleri bolan şypahanalaryň ählisi tomus paslynda has-da köp adamly bolýar.  Şeýle ajaýyp saglyk ojaklarynyň biri-de welaýatymyzyň Baýramaly şäherinde ýerleşýän “Baýramaly” şypahanasydyr.  Arassa, tämiz howasy, jana şypaly bejergileri, özüniň aýratynlyklary bilen beýleki şypahanalardan tapawutlanýan “Baýramaly” şypahanasy, indi ençeme ýyl bäri halkyň hyzmatynda. Bir wagtda 800-e golaý raýata dynç hem bejergi berýän şypahananyň gür baglyga, gül-gülzarlyga beslenmegi bu ýere gelýän raýatlarymyzyň ruhuny has-da belende göterýär. Gün şöhlesiniň iň köp düşýän ýeri hökmünde tapawutlanýan şypahanada adamlaryň dynç almagy, saglygyny dikeltmegi üçin ähli şertler döredilip, iň kämil tehnologiýaly bejeriş enjamlary ulanylýar. Onda elektroforez, lazer bejergi, dürli görnüşli galwaniki toklar, fizio-bejergiler, mundan başga-da, owkalamagyň dürli görnüşleri raýatlara lukmanlaryň görkezmesi esasynda bellenilýär. Bu ýerde oturdylan döwrebap lukmançylyk enjamlary adamyň gan aýlanyşygyny, daýanç hereketlerini, böwregiň, ýüregiň, gan-damar hem-de merkezi nerw ulgamlarynyň işini kadalaşdyrmaga kömek edýär.  “Baýramaly” şypahanasynda mineral wannalar üçin 870 metr çuňlukdaky dik guýudan çykýan hlorid-natriý mineral suwy ulanylýar. Mundan başga-da, ynsan saglygyny duzly we ýodly howa bilen bejerýän ýöriteleşdirilen otaglar hem bar. Döwrebap şypahanada Günüň şöhlesiniň täsiri astynda bejeriş usullarynyň bardygyny hem aýratyn bellemek gerek. Şypahananyň Gün wannasy diýlip atlandyrylýan ýerinde bolsa, bir wagtyň özünde adamlaryň 50-si bejergi alyp bilýärler. Lukmanlar bu usulyň böwrek-peşew ýollaryny bejermekde uly ähmiýetiniň bardygyny aýdýarlar.  Şypahananyň sport zalynda hem ynsan saglygyny bejermekde giň mümkinçilikler döredilendir. Raýatlaryň sport enjamlarynyň kömegi bilen bejerilmegi hem olar üçin örän peýdaly hem täsirlidir.  Ynsanyň göwnüni howasy, owadanlygy bilen göterýän şypahananyň giň we döwrebap naharhanasynda bolsa, dynç alýanlaryň kadaly iýmitlenmegi üçin uly alada edilýär. Raýatlar diňe bir bejergi usullary bilen däl, eýsem, berhizli tagamlar bilen öz saglyklaryny dikeldýärler. Çaýhanada Gahryman Arkadagymyzyň “Türkmenistanyň dermanlyk ösümlikleri” atly köp jiltli ylmy-ensiklopedik kitabynda beýan edilýän dermanlyk ösümliklerden taýýarlanylýan melhem çaýlarynyň dürli görnüşleriniň raýatlara hödür edilmeginiň özi hem ynsan saglygy ugrunda uly aladanyň edilýändigini äşgär edýär.  Şypahananyň ajaýyp howasyndan, eli ýeňil lukmanlaryň bejergilerinden hoşal bolýan ildeşlerimiz ynsan saglygy ugrunda aladalanyp, bimöçber işleri durmuşa geçirýän Gahryman Arkadagymyza, Arkadagly Gahryman Serdarymyza köp sagbolsunlaryny aýdýarlar. Sülgün ŞADYÝEWA.

Adam jemgyýetiň we döwletiň iň gymmatly baýlygydyr. “Döwlet adam üçindir!” diýen ynsanperwer taglymatyň esasy maksady ynsan saglygyny goramakdan ybaratdyr. Ýurdumyzda saglygy goraýyş ulgamynda alnyp barylýan işler, gazanylýan üstünlikler Gahryman Arkadagymyzyň, Arkadagly Gahryman Serdarymyzyň halk üçin edýän bimöçber tagallalarynyň miwesidir.  “Donor” latyn sözi bolup, ol “Gan tabşyrýan adam öz ganyny sowgat edýär” diýen many aňladýar. Bütindünýä Saglygy goraýyş guramasynyň 2005-nji ýylyň maý aýynda Şweýsariýanyň Ženewa şäherinde geçiren 55-nji sessiýasy 14-nji iýuny — gan toparyny açan lukman K.Landşteýneriň doglan gününi Bütindünýä donorlar güni diýip tassyklady. Şondan bäri her ýylyň 14-nji iýunynda dünýä ýüzünde, şol sanda, Türkmenistanda hem Bütindünýä donorlar güni bellenilip geçilýär.  Ata-babalarymyzyň ýaşan döwründe-de gan ýaşaýyş güýjüniň çeşmesi hasaplanypdyr. Berilýän ganyň kömegi bilen agyr kesellerden saplanmagyň ýollary tapylypdyr. Gan bejeriş serişdesi hökmünde ulanylypdyr. Ynsan saglygynyň hatyrasyna gan tabşyrmagyň ynsanperwer manysy bar. Donorlar güni mynasybetli welaýat gan bankynyň işgärleri “Ynsanperwerligiň bir damjasy, gan tabşyryň, ömürleri halas ediň!” atly şygar esasynda meýletin gan tabşyrmak işlerine işjeň gatnaşýarlar.  Ganyň bedeniň kesellemeginiň, ýürek-damar keselleriniň, iýmit siňdiriş işiniň bozulmagynyň öňüni almakda, bedende ganyň öz-özünden täzeden döremeginde uly ähmiýetiniň bardygy tassyklanyldy. Donor gan tabşyrandan soňra, beden ony täzeden dikeldip başlaýar.  Donoryň gany näsag adamlary bejermek üçin ornuny çalşyp bolmajak bejeriş serişdesidir. Belli bir ýagdaýlarda gymmat bahaly enjamlaryň we derman serişdeleriniň bardygyna garamazdan, näsagyň janyny diňe ganyň goýberilmegi halas edip biler. Hut şonuň üçinem her gün diýen ýaly adamlaryň ençemesi janynyň halas edilendigi üçin donorlara sagbolsun aýdýarlar. Halkymyzyň saglygyny goramakda, agzybirligini pugtalandyrmakda alyp barýan beýik işleri üçin Gahryman Arkadagymyza, Arkadagly Gahryman Serdarymyza alkyşymyz çäksizdir.  Çeper ANNADURDYÝEWA.

Türkmen halysy dünýäniň çeperçilik sungatynyň genji-hazynasydyr. Sungatyň iň ýokary derejesine ýetirilen, dünýä gözelliginde görnükli orun tutýan bu ajaýyp senediň köp asyrlyk taryhy bar. Onda halkymyzyň müňýyllyklardan gözbaş alýan geçmişi, şu güni, ertirki aýdyň geljegi şöhlelenýär. Asyrlaryň jümmüşinden gaýdýan gözellik sungatynyň reňkleri müňlerçe ýyllaryň dowamynda işlenipdir hem-de kämilleşipdir. Türkmen halysyna salnan nagyşlaryň reňkleriniň öçmezligi dünýäniň haly sungatyny öwrenijiler üçin heniz hem syrlygyna galýar. Kämillik derejesine ýetirilen bu sungat öz göllerinde we nagyşlarynda ata-babalarymyzyň durmuşy, ruhy dünýäsi baradaky maglumatlary jemleýär.  Golaýda Garaşsyz, hemişelik Bitarap Watanymyzda milli halyçylyk sungatyny ösdürmekde, halkymyzyň buýsanjyna öwrülen türkmen halylarynyň deňsiz-taýsyz gözelligini we nepisligini äleme ýaýmakda çekýän yhlasly zähmeti we görkezen hünär ussatlygy üçin we Türkmen halysynyň baýramy mynasybetli çeper elli halyçylarymyzyň ençemesi belent ada eýe boldy. Türkmenistanyň Prezidentiniň Permany bilen maňa-da “Türkmenistanyň at gazanan halyçysy” diýen hormatly ada mynasyp bolmak bagty miýesser etdi. Bu gün meniň buýsanjymyň çägi ýok.  Men indi birnäçe ýyl bäri “Türkmenhaly” döwlet birleşiginiň Mary çeper halyçylyk kärhanasynyň Mary haly önümhanasynyň gözegçi ussasy bolup zähmet çekýärin. Ýurdumyzda päk zähmete uly sarpa goýulýar. Bu bolsa, bize öňküden-de joşup işlemäge güýç-kuwwat berýär.  Biz — halyçy gyz-gelinleriň zähmetine ýokary baha berip, nepis sungatymyzy dünýä derejesinde dabaralandyrýan Gahryman Arkadagymyzyň, Arkadagly Gahryman Serdarymyzyň il-ýurt bähbitli tutumly işleri hemişe rowaçlyklara beslensin!   Orazgözel PÄLWANOWA.

Arkadagly Gahryman Serdarymyzyň oýlanyşykly ykdysady syýasaty netijesinde milli ykdysadyýetimiziň ösüşli menzilleri rowaçlanýar. Önümçilik kuwwatlyklaryna öňdebaryjy tehnologiýalaryň, sanly ykdysadyýetiň we innowasiýalaryň giňden ornaşdyrylmagy ýokary görkezijileriň gazanylmagyna mümkinçilik berýär. Şeýle öňegidişliklere elektroenergetika pudagynda gazanylýan üstünlikleriň mysalynda doly göz ýetirmek bolýar.  Elektroenergetika pudagy ýurdumyzyň öňdebaryjy we iri pudaklarynyň biri bolmak bilen, elektrik energiýasyny öndürmekde belent sepgitlere eýe bolunýar. Pudagyň önümçilik kärhanalaryna häzirki zaman tehnologiýalary ornaşdyrylyp, gowy netijeler gazanylýar. Mary DES-niň senagat zolagynda gurlup, ulanylmaga berlen döwrebap elektrik stansiýalary ýokarda ýatlanymyza aýdyň mysalydyr. Ýokarda ýatlanan meseleleriň oňyn çözgüdi belli bir derejede institutymyzda bilim alýan, hünär öwrenýän talyplaryň hünär taýýarlyklaryna baglydyr. Şonuň üçin biz — ýaşlaryň talaba laýyk bilim almaklary, saýlan ugurlary boýunça işine ökde, ezber hünärmenler bolup ýetişmekleri ugrunda uly aladalary edýäris. Wepa DAŇATAROW.  

Türkmen halky hormatly Prezidentimiziň baştutanlygynda “Garaşsyz, baky Bitarap Türkmenistan — bedew batly at-myradyň mekany” ýylyny zähmet üstünliklerine beslemek maksady bilen tutanýerli zähmet çekýär. Ýurdumyzyň halk hojalygynyň dürli pudaklarynda ýokary görkezijiler gazanylyp, Watanymyz ýeňişli menziller bilen öňe barýar. Şeýle belent sepgitlere ýetilmeginde zähmet adamlary hakda alada uly orun degişli bolup durýar. Şu wajyp wezipäniň oňyn çözgüdiniň gazanylmagynda welaýat birleşmämiz tarapyndan netijeli işler durmuşa geçirilýär. Hünärmenlerimiz tarapyndan kärdeşler arkalaşyklarynyň ilkinji guramalarynyň öz işlerini şu günüň talabyna laýyk guramaklaryna goldaw-ýardam berilýär. Zähmet adamlarynyň iş we durmuş şertlerini gowulandyrmak bilen bagly meseleleriň has bähbitli çözgütleri gözlenilip, işleriň guramaçylykly ýola goýulmagynda degerli çäreler görülýär. Sebäbi, işgärleriň iş we durmuş şertleri näçe ýokarlandyrylsa, öňdebaryjylar höweslendirilse, önümçilikde gazanylýan görkezijilerem ýokary bolýar. Bägül ATAÝEWA. 

Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda oba hojalyk pudagyny özgertmek we ösdürmek, azyk bolçulygyny üpjün etmek boýunça döwlet ähmiýetli, il bähbitli göwrümli işler durmuşa geçirilip, ýokary netijelere eýe bolunýar. Mukaddes Garaşsyzlygymyzyň şanly 35 ýyllygynyň toýy belleniljek, “Garaşsyz, baky Bitarap Türkmenistan — bedew batly at-myradyň mekany” ýylynda edermen gallaçy kärendeçilerimiz, ýer eýeleri özleriniň yhlasly zähmeti bilen ak bugdaýyň bol hasylyny ösdürip ýetişdirdiler. Şu günler welaýatymyzyň zähmetsöýer gallaçylary 170 müň gektarda gallanyň ýokary hasylyny ýetişdirip, meýilnama boýunça 345 müň tonna bugdaý hasylyny Watan harmanyna tabşyrmagy öz öňlerinde wezipe edip goýdular. Üstümizdäki ýylyň 3-nji iýunyndan Arkadagly Gahryman Serdarymyzyň galla oragyna ak pata bermegi welaýatymyzyň edermen gallaçylaryny ýokary zähmet ýeňişlerine ruhlandyrdy. Häzirki günlerde galla oragy gyzgalaňly dowam edýär. Ýetişdirilen hasyly çalt we zaýasyz ýygnamak üçin ähli güýçler jemlenildi. Işler guramaçylykly alnyp barylýar. Galla ýygyjy kombaýnlaryň, ýük daşaýjy awtoulaglaryň sazlaşykly guralan işi netijesinde galla meýdanynda saçaklarymyzyň berekedi bolan guşgursak ak bugdaýyň möçberi artýar. Edermen gallaçy kärendeçileriň ýüzlerçesi şertnamalaýyn borçnamalaryna artygy bilen hötde gelýärler. “Garaşsyz, baky Bitarap Türkmenistan — bedew batly at-myradyň mekany” ýylynyň bugdaý oragy möwsüminiň başlanmagynyň öňýanynda täze tehnologiýaly oba hojalyk tehnikalarynyň we awtoulaglaryň nobatdaky tapgyrynyň gelip gowuşmagy hem-de degişli kärhanalaryň ygtyýaryna berilmegi oba hojalyk işgärlerini hyjuwly zähmet üstünliklerine ruhlandyrdy. Welaýatymyzyň “Obahyzmat” önümçilik birleşigine dünýä meşhur “CLAAS TRION 520” kysymly bugdaý orujy kombaýnlaryň 26-sy hem-de “Sinotruk Homan” kysymly ýangyç daşaýjy awtoulaglaryň 19-sy, Ýer serişdeleri müdirligine “Toyoto-Hilux” kysymly ýeňil awtoulaglaryň 15-si, Marynyň abatlaýyş zawodyna “SITRAK-F” kysymly ýük ulaglarynyň 2-si gelip gowuşdy. Olar tejribeli mehanizatorlara we sürüjilere berkidildi. Täze kombaýnlar bugdaý oragy möwsüminde öndürijilikli işledilip, welaýatyň gallaçylarynyň ýetişdiren hasylyny çalt we ýitgisiz ýygnamaga ýakyndan ýardam berer. Sähet HOJAGELDIÝEW.

Döwlet Baştutanymyzyň amala aşyrýan giň gerimli özgertmeleriniň netijesinde, syýasy ulgamy has-da kämilleşdirmäge, döwlet we jemgyýetçilik durmuşynyň ähli taraplaryny demokratiýalaşdyrmaga aýratyn orun berilýär. Ýurdumyz bu günki gün demokratik ýörelgeleri çuňlaşdyrmak ýoly bilen öňe ynamly gadam urýar. Demokratik şertleriň çäklerinde ýurdumyzda her bir raýatyň saýlaw hukuklarynyň üpjün edilmegine hem uly üns berilýär. Ýurdumyzda saýlawlar Türkmenistanyň Konstitusiýasyna, Türkmenistanyň Saýlaw kodeksine laýyklykda guramaçylykly geçirilýär. Raýatlaryň saýlaw hukuklarynyň kepillikleriniň kanunalaýyk üpjün edil-meginde ýurdumyzda hereket edýän saýlaw toparynyň möhüm ähmiýeti bardyr.  Mälim bolşy ýaly, welaýat saýlaw toparynyň ygtyýarlyk möhletiniň tamamlanmagy sebäpli, welaýat saýlaw toparynyň täze düzümini döretmek işleri Türkmenistanyň Saýlaw kodeksine laýyklykda, tassyklanylan meýilnama esasynda amala aşyrylýar. Welaýat saýlaw toparlary Merkezi saýlaw topary tarapyndan 9 — 13 agzadan ybarat düzümde döredilýär. Türkmenistanyň Saýlaw kodeksiniň 18-nji maddasyna laýyklykda, welaýat saýlaw toparlarynyň düzümine wekiller syýasy partiýalaryň, jemgyýetçilik birleşikleriniň, welaýat, etrap, şäher guramalarynyň mejlislerinde, raýatlaryň toparlarynyň ýygnaklarynda hödürlenildi. Raýatlar toparlary tarapyndan saýlaw toparynyň düzümine wekil hödürlemek boýunça raýatlaryň ýygnagyna degişli etrabyň, şäheriň çäginde ýaşaýan saýlaw hukukly raýatlar gatnaşdylar. Welaýat saýlaw toparynyň düzümine wekil hödürlemäge bagyşlanan mejlislerde we ýygnaklarda saýlaw toparynyň düzümine hödürlenilýänleriň çäklendirilmedik sany ara alnyp maslahatlaşyldy. Her mejlisde we ýygnakda welaýat saýlaw toparynyň düzümine kanunalaýyklykda diňe bir wekil, özi hem il içinde uly abraýdan peýdalanýan, guramaçy, işbaşarjaň adam hödürlenildi. Welaýat saýlaw toparynyň düzümine saýlanan agzalar geljek bäş ýylyň dowamynda geçiriljek saýlawlaryň guramaçylykly geçirilmegine işjeň gatnaşarlar.  Gulälek GURBANGULYÝEWA.

Döwlet nyşanlarymyzy we Baş Kanunymyzy sarpalamak, olaryň many-mazmunyny ýaş nesilleriň kalbyna siňdirmek maksady bilen welaýat kitaphanasynyň kiçi mejlisler zalynda welaýat kitaphanasynyň hem-de Türkmengala etrap merkezi kitaphanasaynyň bilelikde guramagynda «Döwletimiziň mukaddes nyşanlary» atly maslahat geçirildi. Oňa kitaphanaçylar, harby gullukçylar, welaýatyň «Marguş» çagalar we ýetginjekler döredijilik öýüniň çagalary, Mary şäherindäki daşary ýurt dillerine ýöriteleşdirilen 11-nji we 23-nji orta mekdepleriň okuwçylary gatnaşdylar. Maslahatyň dowamynda belent sepgitleri we watançylyk ýörelgelerini öz içine alýan birnäçe gymmatly çykyşlara giň orun berlip, onda Türkmengala etrap merkezi kitaphanasynyň kitaphanaçysy Oguljan Paýzyýewa, Türkmenistanyň Döwlet Serhet gullugynyň serkerdesi Merdan Muhamow, welaýat kitaphanasynyň kitaphanaçysy Göwher Ataýewa çykyş etdiler. Olar parahatçylygyň we durnuklylygyň nyşany bolan Döwlet baýdagymyza goýulýan sarpanyň ýokarydygy, onuň giň many-mazmuna eýedigi, Baş Kanunymyzda bellenilýän her bir maddanyň halkymyzyň bähbidine gönükdirilendigi hakynda giňişleýin gürrüň etdiler.  Maslahatyň dowamynda «Marguş» çagalar we ýetginjekler döredijilik öýüniň «Ýaş jahankeşde» gurnagynyň ýolbaşçysy Gülnar Meredowanyň okuwçylarynyň döwlet nyşanlarymyzy, asuda we bagtyýar durmuşymyzy wasp edýän şygyrlary labyzly we joşgunly okap bermekleri gatnaşyjylaryň ählisinde ýakymly ýatlamalary galdyrdy. Merjen ATAÝEWA.  

 Türkmenistanyň Konstitusiýasynyň we Türkmenistanyň Döwlet baýdagynyň gününe bagyşlanylyp, TAP-nyň welaýat, Mary şäher komitetleriniň bilelikde guramagynda  TKA-nyň welaýat birleşmesiniň mejlisler zalynda “Ýaşyl Tugy täç edinip, öňe barýar eziz Watan!” ady bilen maslahat geçirildi. Maslahata Türkmenistanyň Mejlisiniň deputatlary, welaýat, etrap, şäher halk maslahatlarynyň agzalary, TAP-nyň welaýat, şäher komitetleriniň işgärleri gatnaşdylar.  Maslahatda TAP-nyň welaýat komitetiniň bölüm müdiri Güljemal Nazarowa, TKA-nyň Şatlyk şäher birleşmesiniň başlygy Gurbanmuhammet Babaýew, TAP-nyň Murgap etrap komitetiniň hünärmeni Näzik Mukymowa çykyş etdiler. Çykyş edenler eziz Watanymyzyň her bir gününiň toý-baýramlara beslenýändigi, Türkmenistanyň Konstitusiýasynyň we Türkmenistanyň Döwlet baýdagynyň güni  mynasybetli geçirilýän  baýramçylyk çäreleriniň ýurdumyzyň ähli ýerinde giňden dabaralanýandygy dogrusynda giňişleýin gürrüň etdiler.  Mähriban MUHAMMETMYRADOWA.  

“Garaşsyz, baky Bitarap Türkmenistan — bedew batly at-myradyň mekany” ýylynyň şanly senesi bolan Türkmenistanyň Konstitusiýasynyň we Türkmenistanyň Döwlet baýdagynyň güni uly şatlyk-şowhuna beslendi. Ýurdumyzyň ähli ýerlerinde bolşy ýaly, bu baýramçylygyň dabarasy biziň welaýatymyzda-da giňden ýaýbaňlandyryldy. Mary şäherindäki Baş baýdak meýdançasy ir säherden köp adamly boldy. Toý lybasly meýdançadaky ýaşyl Baýdaklaryň buýsançly görnüşi dabaranyň şowhunyny has-da artdyrdy. Bu sene mynasybetli bu ýere ýygnanan adamlaryň ruhubelentligi dabara baýramçylyk öwüşginini çaýdy.  Baýramçylyk mynasybetli Döwlet baýdagyny galdyrmak dabarasyna welaýat häkimliginiň ýolbaşçylary, şäher, etrap häkimleri, Türkmenistanyň Mejlisiniň deputatlary, edara-kärhanalaryň ýolbaşçylary, syýasy partiýalaryň we jemgyýetçilik guramalarynyň hem-de ýaşuly nesliň wekilleri we ýaşlar gatnaşdylar. Dabarada Marynyň Ýolaman Hummaýew adyndaky ýörite sazçylyk mekdebiniň talyplarynyň ýerine ýetirmeklerinde Türkmenistanyň Döwlet senasy ýaňlandy we buýsançly owazyň astynda Döwlet baýdagy galdyryldy. Baýdak galdyrmak dabarasynda welaýatyň häkimi Döwranberdi Annaberdiýew, Sakarçäge etrabynyň ýaşaýjysy Tuwakmyrat Jumaýew, welaýat statistika müdirliginiň bölüm başlygy, Türkmenistanyň Mejlisiniň deputaty Jumageldi Ataýew, welaýat halk maslahatynyň başlygy Maksat Atajanow çykyş etdiler. Çykyş edenler dabara gatnaşyjylary Türkmenistanyň Konstitusiýasynyň we Türkmenistanyň Döwlet baýdagynyň güni bilen mähirli gutladylar. Hormatly Prezidentimiz Arkadagly Gahryman Serdarymyzyň baştutanlygynda durmuşa geçirilýän giň möçberli işler, ýetilen sepgitler dogrusynda buýsançly gürrüň etdiler. Soňra bu dabara aýdym-sazly çykyşlara utgaşdy. Welaýatymyzyň medeniýet we sungat ussatlarynyň aýdym-sazly çykyşlary, tansçylaryň şowhunly tanslary baýramçylyk dabarasynyň şatlyk-şagalaňyny artdyrdy. Aýparça AKYMOWA.

Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli Türkmenistanyň Agrar Partiýasynyň Mary welaýat we Mary şäher komitetleriniň hem-de Mary  welaýat Taryhy we ülkäni öwreniş muzeýiniň bilelikde gurnamaklarynda terbiýeçilik ähmiýetli, wagyz – nesihat çäresi geçirildi. Bu dabara Türkmenistanyň Agrar Partiýasynyň welaýat, şäher, etrap komitetleriniň işgärleri we işjeň agzalary we muzeý işgärleri uly ruhubelentlikde  gatnaşdylar. Dabaranyň dowamynda çykyş edenler beýik özgertmeleriň we ösüşleriň ýoly bilen öňe barýan eziz ýurdumyzda  ynsanperwerlik, parahatçylyk söýüjilik, hoşniýetli goňşyçylyk ýörelgelerini öňe sürýän Arkadagly Gahryman  Serdarymyzyň ýolbaşçylygynda Konstitusiýamyza we Döwlet baýdagymyza belent sarpa goýulýar we bu goşa baýramyň Diýarymyzda ýokary ruhubelentlikde bellenilmegi halkymyzy täze ýeňişlere ruhlandyrýan diýip uly buýsanç bilen belläp geçdiler. Şeýle-de  Hormatly Prezidentimiziň döwletli baştutanlygynda halkymyzyň milli öwüşginli medeni mirasyny  goramak, aýawly saklamak we muzeýleşdirmek işleriniň üstünlikli alnyp barylýandygyny we  ýurdumyzda hereket edýän döwlet muzeýlerindäki gadymy türkmen taryhynyň öçmez syrlary bolan milli medeni gymmatlyklarymyzyň, taryhy tapyndylarymyzyň sanynyň barha artýandygyny aýratyn nygtap geçdiler. Hormatly Prezidentimiziň ýolbaşçylygynda halkymyzyň geçmiş taryhyny, milli mirasyny gorap, geljekki nesillere miras goýmak, muzeý gymmatlyklarynyň üsti bilen Watanymyzyň şöhratly taryhyna söýgi döretmek, şeýle-de, muzeý hünärmenleriniň hünär ussatlygyny kämilleşdirmek dogrusynda täsirli gürrüňler edildi. Dabara gatnaşan bagtyýar adamlar asudalygyň we bagtyýarlygyň nyşany bolan, parahatçylyk we adalatlylyk baradaky milli düşünjeleri özünde jemleýän  Konstitusiýamyz,  dostlugymyzyň we hoşniýetliligimiziň nyşany hökmünde ýer ýüzünde belentde pasyrdaýan Döwlet baýdagymyz biziň milli guwanjymyzdyr, dünýä ýaň salýan abraýymyz we mertebämizdir diýip ýürek buýsançlaryny belläp geçdiler. Dabara gatnaşanlar halkymyzyň medeni mirasyny  goramak, aýawly saklamak we geljekki nesillere miras goýmak ugrunda giň mümkinçilikleri döredip berýän Hormatly Prezidentimiziň janynyň sag bolmagyny, ömrüniň uzak bolmagyny, alyp barýan döwlet ähmiýetli işleriniň diňe rowaçlyklara beslenmegini tüýs ýürekden arzuwladylar. Aýnabat Annagurbanowa.

    Türkmenistanyň Kärdeşler Arkalaşyklarynyň Mary welaýat birleşmesiniň gurnamagynda Türkmenistanyň Konstitusiýasynyň we Döwlet baýdagynyň güni mynasybetli okuw maslahaty geçirildi.Okuw maslahatyna Türkmenistanyň Kärdeşler Arkalaşyklarynyň welaýat çäk birleşmeleriniň,pudaklaýyn geňeşleriniň we ilkinji guramalarynyň ýolbaşçylary,bölüm müdirleri,hünärmenleri gatnaşdylar. Bu ýerde çykyş eden adamlar maslahata gatnaşanlary Türkmenistanyň Konstitusiýasynyň we Döwlet baýdagynyň güni mynasybetli gutladylar.Şeýle-de Hormatly Prezidentimiziň alyp barýan il-ýurt bähbitli syýasatlaryny wagyz etmekde,ilkinji guramalaryň alyp barýan işleriniň netijeliligini ýokarlandyrmakda durmuşa geçirilýän işler dogrusynda durup geçdiler. Kärdeşler Arkalaşygy guramalaryna täze iş usullaryny ornaşdyrmak, iş  tejribesini alyşmak barada hem aýratyn nygtalyp geçildi.Okuw maslahatyna gatnaşanlar Kärdeşler Arkalaşyklarynyň işlerini özgertmekde amala aşyrýan işleri üçin Türkmen halkynyň Milli Lideri Gahryman Arkadagymyza hem-de Hormatly Prezidentimiz Arkadagly Gahryman Serdarymyza alkyş sözlerini aýtdylar. Çarymuhammet Saparow.

    “Garaşsyz baky Bitarap Türkmenistan bedew batly at myradyň mekany” ýylynda Türkmenistanyň döwlet energetika institutynda, “Türkmenistanyň konstitusiýasynyň we Türkmenistanyň Döwlet baýdagynyň güni” mynasybetli Türkmenistanyň Magtymguly adyndaky Ýaşlar guramasynyň Mary welaýat Geňeşi we şäher, etrap Geňeşleri hem-de Türkmenistanyň Döwlet energetika institutynyň bilelikde guramaklarynda  “Baýdagymyz-başymyzyň täjidir, Kanunymyz-kalbymyzyň güýjidir” atly aýdym-sazly maslahat duşuşygy geçirildi. Duşuşyga ýaşlar guramasynyň Mary welaýat geňeşiniň işgärleri, institutyň professor mugallymlary we talyp ýaşlary gatnaşdylar. Maslahatda çykyş edenler “Garaşsyz baky Bitarap Türkmenistan bedew batly at myradyň mekany” ýylynda ýurdumyzda alynyp barylýan işler we Garaşsyzlyk ýyllary içinde milli ykdysadyýetimizi ähli taraplaýyn ösdürmekde Esasy Kanunymyzyň  ähmiýeti we Watanymyzyň asudalygynyň, jebisliginiň, erkana ýaşaýşymyzyň nyşany hökmünde belentde parlaýan ýaşyl Tugumyzyň mukaddesligi dogrusynda giňişleýin gürrüňler etdiler. Maslahata gatnaşanlar il-ýurt bähbitli uly işleri durmuşa geçirýän, Watanymyzyň halkara abraýyny belende göterýän türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň adyna alkyş sözlerini aýtdylar. Şeýle-de bu ýerde talyp ýaşlaryň aýdym-sazly çykyşlaryna-da uly orun berildi. Nurjahan Mämmedowa.

   Berkarar döwletiň täze eýýamynyň Galkynyşy döwründe Hormatly Prezidentimiz Arkadagly Gahryman Serdarymyzyň, Türkmen halkynyň Milli Lideri Gahryman Arkadagymyzyň parasatly baştutanlygynda türkmen halkymyz ösüşlerden ösüşlere barýar. Her bir günümiz toý – baýramlara, şanly wakalara beslenýär. Her ýyl Türkmenistanyň Konstitusiýasynyň we Döwlet baýdagynyň güni uly dabaralar bilen bellenip geçirilýär. Şu goşa mukaddeslige bagyşlanyp Türkmenistanyň Demokratik partiýasynyň Mary welaýat, Mary, Baýramaly şäher, Oguzhan, Mary, Wekilbazar, Sakarçäge, Baýramaly, Garagum, Türkmengala, Ýolöten, Murgap etrap komitetleriniň we welaýat Baş bilim müdirliginiň bilelikde gurnamagynda “Parahatlyk nyşany sen baýdagym, adalat Kanunym köňül aýdymym” atly dabaraly maslahat geçirildi. Maslahata Türkmenistanyň Mejlisiniň deputatlary, welaýat, şäher, etrap Halk Maslahatynyň agzalary, Türkmenistanyň Demokratik partiýasynyň Mary welaýat, şäher, etrap komitetleriniň işgärleri we işjeň agzalary, köpçülikleýin habar beriş serişdeleriniň wekilleri gatnaşdylar. Bu maslahatda edilen çykyşlarda Diýarymyzyň Garaşsyzlygyny, hemişelik Bitaraplygyny pugtalandyrmakda, raýatlarymyzyň hukuklaryny kepillendirmekde, milli ykdysadyýetimizi ähli taraplaýyn ösdürmekde Esasy Kanunymyzyň orny we ähmiýeti barada giňişleýin gürrüň edildi. Bu ýerde çykyş edenler Watanymyzyň asudalygynyň, jebisliginiň, erkana ýaşaýşymyzyň nyşany hökmünde belentde parlaýan ýaşyl Tugumyzyň mukaddesligi dogrusynda hem buýsançly söhbet etdiler. Maslahata gatnaşanlar il-ýurt bähbitli uly işleri durmuşa geçirýän, Watanymyzyň halkara abraýyny belende göterýän Hormatly Prezidentimiziň adyna alkyş we hoşallyk sözlerini beýan etdiler. Nabat Atajanowa.

«Garaşsyz, baky Bitarap Türkmenistan — bedew batly at-myradyň mekany» ýylyny ýeňişlere besleýän türkmen ili Arkadagly Gahryman Serdarymyzyň baştutanlygynda has-da bagtyýar ertirine barýar. Ajap eýýamymyzda toýlary goşa-goşadan gelýän halkymyz uly toýuna taýýarlyk görýär. Türkmenistanyň Konstitusiýasynyň we Döwlet baýdagynyň baýramynyň buýsançly aýratynlygy Garaşsyz, baky Bitarap döwletimiziň berkararlygynda jemlenýänligindedir. Esasy Kanunymyz ýurdumyzyň berkararlygyny hukuk taýdan ykrar edip, ähli ugurlardaky ösüşlerimiziň hukuk binýadyny pugtalandyrýar.   Türkmenistanyň Konstitusiýasynyň kabul edilen güni gadymy türkmen halkynyň demokratik, hukuk we dünýewi döwleti gurmakdaky wajyp hem-de aýgytly ädimi hökmünde taryha girdi. Bilşimiz ýaly, Konstitusiýamyz Garaşsyz, baky Bitarap döwletimiziň Esasy Kanuny bolmak bilen, ýurdumyzyň hereket edýän kanunçylygynyň binýady bolup durýar. Onda döwletiň gurluşynyň hukuk ýagdaýy kesgitlenilýär.   Esasy Kanunymyzda Döwlet baýdagymyzyň Türkmenistanyň özygtyýarly döwlet hökmündäki nyşanlaryň biridigi bellenen. Döwlet baýdagymyz döwletimiziň özygtyýarlylygyny we berkararlygyny alamatlandyrýan mukaddeslikdir. Merdana ata-babalarymyz şan-şöhrata beslenen gahrymançylykly asyrlary  aşyp, bu gün türkmen ili abraý-mertebesi dünýä dolan Garaşsyz, Bitarap Türkmenistan döwletine guwanýar we buýsanýar.  Güljeren MYRADOWA.

Bahar paslynyň ajaýyp gözelligi

Fotoreportaj: Futbol boýunça Türkmenistanyñ çempionaty 12-nji tapgyr Altyn Asyr - Merw

Fotoreportaj: Futbol boýunça Türkmenistanyñ çempionaty Merw 1-1 Altyn Asyr

Fotoreportaž: Mary welaýaty: Çagalary goramagyň halkara güni mynasybetli geçirilen dabaralardan pursatlar

Fotoreportaž: Mary welaýatynda Bütindünýä welosiped güni bellenilip geçildi.

Fotoreportaž: Mary welaýaty: Türkmenistanyň ÝUNESKO agzalygyna kabul edilmeginiň 30 ýyllygyna bagyşlanan dabaralardan pursatlar.

Fotoreportaj: DÇ-2026 saýlama tapgyry Türkmenistan 0-1 Eýran yslam respublikasy

Fotoreportaj: Mary şäheriniň Çagalar çeperçilik mekdebiniň okuwçylarynyň işleri