Berkarar döwletiň täze eýýamynyň Galkynyşy döwründe hormatly   Prezidentimiziň taýsyz tagallalary netijesinde gözel Diýarymyzda bedenterbiýäni we sporty ösdürmekde uly işler alnyp barylýar. Ýurdumyzyň ähli künjeginde sport toplumlary, sport mekdepleri, stadionlar gurlup, olarda sportuň dürli görnüşleri bilen meşgullanmaga mümkinçilikler döredilýär. Şol mümkinçiliklerden giňden peýdalanýan türgenlerimiz ýurdumyzyň sport  abraýyny dünýä ýüzüne äşgär edýärler.  Welaýatymyzyň taekwon-do ITF ussatlary ýurdumyzda hem-de daşary ýurtlarda geçirilýän ýaryşlara yzygiderli gatnaşyp, ýurdumyzyň sport abraýyny barha arşa göterýärler. Olar ýakynda Gazagystan döwletiniň Çimkent şäherinde Aziýanyň kubogyny almak ugrundaky ýaryşda özleriniň ukyp-başarnyklaryny görkezip, 9 sany altyn, 10 sany kümüş we 9 sany bürünç medallara eýe boldular. Şonuň bilen birlikde, olar ýurdumyzyň sport abraýyny ýene bir gez beýgeltmegi başardylar.  Aziýa kubogyny almak ugrunda geçirilen bu ýaryşda Mary şäherindäki 4-nji sport mekdebiniň türgenleri Rahat Jumanazarow, Agamyrat Amansähedow, Täçmyrat Kakamyradow, Çynar Gaýgysyzowa, Aýjan Ýusubowa, Mary şäherindäki 8-nji sport mekdebiniň türgeni Çary Muhammedow, Mary etrabyndaky Saparmyrat Türkmenbaşy adyndaky sport mekdebiniň türgenleri Daýanç Ýazmyradow, Goşanyýaz Durdyýew baýrakly orunlara eýe bolup, ussatlyklaryny görkezdiler. Bu türgenleriň  halkara ýaryşlarynda gazanýan üstünlikleri bizi, diýseň, begendirýär, buýsandyrýar — diýip, Türkmenistanyň halkara derejeli sport ussady, gara guşagyň 6-njy danynyň eýesi Gaýgysyz Atabaýew uly buýsanç bilen belleýär. Welaýatymyzyň taekwon-do ITF ussatlary Aziýa döwletleriniň arasyndaky we Italiýa döwletinde dünýäniň kubogyny almak ugrunda geçiriljek ýaryşlara taýýarlyk görýärler. Biz hem öz gezegimizde taekwon-do ITF ussatlarymyza geljekde hem üstünlikleriň hemra bolmagyny arzuw edýäris. Aýdogdy ATABAÝEW.

Dünýäde almanyň 7 müňden gowrak görnüşi bar. Alma dünýäniň iň bir köp iýilýän ir-iýmişleriniň hataryna girýär. Biz ony ter görnüşinde we ondan şerbet, bal gaýnadyp iýýäris. Almanyň 200 gramynda 104 kilokaloriýa bar. Almanyň 80 göterimi suwdan, 20 göterimi bolsa kletçatkadan we beýleki maddalardan ybaratdyr. Onuň düzüminde uglewodlar, witaminler, minerallar  we  kaliý, kalsiý, demir, sink, ýod  bar. Almanyň düzümindäki maddalar holesteriniň mukdaryny azaldýar, gan basyşynyň peselmegine eltýär. Ondaky C witamin adamyň immun ulgamyny güýçlendirýär, kaliý bolsa ýürek-damar keselleriniň öňüni almakda oňaýly täsir edýär, buşukmagy ýeňilleşdirýär. Sink immun ulgamyny berkidýär, horlanmaga ýardam berýär. Almanyň düzümindäki kwersetin beýniniň zeperlenmesiniň öňüni alýar.  Düzüminde demir bolansoň ol demir ýetmezçilikli ganazlykda ulanylýar. Alma iýmit siňdiriş ulgamynyň gowulaşmagyna ýardam berýär, iç gatamanyň öňüni alýar. Almanyň düzümindäki pektin bedeni zäherli maddalardan arassalaýar, pektiniň mikroblary gyryjy täsiri hem bar we ol dişi arassalaýar. Günde 1-2 sany alma iýmek bolar. Onuň gabygynda peýdaly zatlaryň köpdügi üçin ony artman iýmeli. Alma çigidiniň 150 sanysy iýlende zäherlenme döräp biler, az mukdarda iýlende, onuň hiç hili zyýany ýokdur. Alma iýlende allergiýa döreýän adamlar ony iýmeli däldirler. Ýara-baş keselinde, aşgazan jerhetlenmesiniň beterleşmesinde, içgeçmede alma iýmek bolmaýar. Çarymyrat ANNAMUHAMMEDOW. 

Bir gezek Jelaleddin Rumy öz şägirtlerini bir daýhanyň birnäçe aýlap guýy gazmak üçin synanyşan meýdanyna getiripdir. Şägirtleriniň kän ol ýere gidesleri gelmändir. Halypa hemme aýtjak zatlaryny şu ýerde hem aýdyp bilerdi. Ýöne Rumy öz diýeninde durupdyr: — Ýörüň meniň bilen, bolmasa, siz meniň näme aýtjak bolýanyma düşünmersiňiz. Gelip görseler, daýhan bir ýerden gazyp başlap, soňra bäş-on ädim süýşüp, täzeden gazyp başlapdyr. Ol ýerden suw tapman, ýene täze ýeri köwüp başlapdyr. Ol eýýäm sekiz çukur gazyp, dokuzynja geçipdir. Şeýdip ol tutuş  meýdany                    gazym-gazym edipdir. Rumy öz şägirtlerine aýdypdyr: — Bu daýhana meňzejek bolmaň!  Eger-de, ol bar güýjüni bir guýy gazmaga sarp eden bolsady, onda näçe çuňda bolsa-da bireýýäm suw tapardy. Ol özüniň bar gujuryny biderek sarp edipdir. Rus dilinden terjime eden Göwher AKMAMEDOWA.

Oba agzybir bolsa goňşaralyga haýat galdyrylyp, ýylgyndan ganat ýasap, ýa çitenekli sim çekilip araçäklenilmeýär. Şonuň üçin obamyzyň bu başyndan ol başy görnüp durandyr. Ýöne mellegarada iki gyrasy miweli bag ekilen, gapdaly ak ýodaly ýansalmalar araçäk görnüşinde durardy. Bir sapar agşamky şemala tänen eriklerden ýaňa, biziň mellegmiz-ä gyzyl ýaýyrt welin, goňşy mellekde-de aýak basara ýer ýokdy. Men her biri bäbek ýumrugy ýaly irbişer, alýaňak erikleri çöpläp ýörşüme, ýansalmadan böküp geçip, goňşular tarapa gaçanlaram alyp ugradym. Ony gören Hojahmet kakam: «Döwwe, gaýdaweri, aýp bolar. Düýbi bizde bolsa-da, şahasy goňşa geçen bagyň miwesi, biýarasy goňşa geçen bakjaň önümi goňşyň paýydyr. Iň bärkisi, goňşularyň melleginde käkeleýän towuk seňki bolsa-da, ýumurtgasy oňkudyr. Gadym döwürler atan awyň goňşa geçse-de alynmandyr. Bu däp ata-babalaryň goňşular baradaky ýazylmadyk kanunydyr. Ana, seret, goňşy Gutly kaka-da bärik gaçan almalary almandyr-a. Doňňara daşly gaýadyr welin, şoňa-da «Salam!» diýip gygyrsaň, olam saňa üç esse köpeldip jogap berýändir.  «Keçe satsaň goňşa sat, üstünde oturyp gaýdarsyň. Baggoýnuňy goňşa sat, şorundan batyrnyp gaýdarsyň» diýýän türkmen aga gowy goňşusyny gardaşyndan gowy görýändir... Goňşy bilen hoşniýetli, dostana gatnaşygyň, mylakatly baryş-gelşiň, alyş-berşiň ýazylmadyk kanuny bolsa nesilden-nesle geçip gelýän mukaddes mirasdyr» diýip, edep beripdi. Her sapar sap-sary bişen erikleriň ysy ýellere garyşyp, gursagyma dolanda, ata-baba ýagşy däbi bozmajak bolup, miras galan agaç tabagy dolduryp goňşulara paýladýaryn. Goňşokara-da goňşaradaky gowy gatnaşygy berkitmegiň bir usuly ahyry. Döwletmyrat JUMADURDYÝEW.

Dünýämiziň örki, gögüň diregi,  Bardyr tomaşaly saparyň, daglar! Bu gün saňa örkläp däli ýüregi,  Senden uly kuwwat taparyn, daglar! Etegiňde iller mekan tutdular, At çapyp, ýaý çekip, peýkam atdylar, Söýüşdiler, uruşdylar — ötdüler,  Menem seni söýüp öterin, daglar! Men-men diýip daga köňül bagladym, Seni görüp, kiçiligme agladym, Boýumy boýuňa deňän haladym, Toba edip öňüňde çökerin, daglar! Niçe danalaryň sözün eşitdiň,  Betpälleri öz päline duş etdiň, Bu gün gelip meniň ýakamdan tutduň, Saňa näme diýip öterin, daglar?! Syn et ummanlaryň gözel görküne, Beýik binalaryň synmaz örküne. Ýamanlygmy goý özümiň erkime, Ýagşylygmy welin aparyň, daglar! Gurbannazar EZIZOW.   Türkmenistanyň halk ýazyjysy.

Agzyna gulp urmak — geplemez ýaly etmek, agyz ýaryp bilmez ýaly etmek, agzyna berk bolmaga mejbur etmek. Agzyna salyp bermek —aýtjak gepini aýdyp bermek, diýjek zadyny salgy bermek, öwretmek. Agzyna sogan dogramazlyk — äsgermezlik etmeklik, aýdanyny diňlemezlik, sylag--hormat goýmazlyk. Agzyny ýerden tapan  ýaly — hetdenaşa köp gepleýän, bolgusyz zatlar barada lakgyldap ýörýän. Agzyny ysgamak — içginsirän bolup, bir zat barada biriniň pikirini bilmäge çalyşmak, osmakladyp sorap, pikirini biljek bolmak. Agzyň gyzmak — gyzyşyp hetdenaşa köp gürlemek, artykmaç ýaňramak. Agzyň ýelini almak — 1. Gürläp keýpden çykmak, müň gepiň başyny agyrtmak. 2. Biriniň üstüne gygyrmak, käýinmek. Agzyna zäk (öt) atylan ýaly bolmak — ýakymsyz gürrüň, habar eşidip, örän gynanmak, bir waka üçin awunmak. “Türkmen diliniň frazeologik sözlügi” kitabyndan.

Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda mekdep okuwçylarynyň iň bir arzyly, şatlyk-şowhuna beslenýän ajaýyp   döwri — tomusky dynç alyş möwsümi dowam edýär. Gahryman Arkadagymyzyň, Arkadagly  Gahryman Serdarymyzyň tagallalary bilen döwrebap çagalar sagaldyş we dynç alyş  merkezleri guruldy. Şolar ýaly merkezler Türkmenistanyň Kärdeşler Arkalaşyklarynyň Milli merkeziniň Gökderedäki “Beýik Serdaryň ruhubelent nesilleri, “Awaza” milli syýahatçylyk zolagynda ýerleşýän “Daýanç” sagaldyş we dynç alyş merkezleri hereket edýär. Bu merkezlerde çagalaryň gowy dynç almaklaryna ähli şertler döredilen. Şeýle-de, bu ýerde kompýuter zaly, oýun oýnalýan merkez, saglygy goraýyş bölümi, sport meýdançalary, suw howdanlary çagalara hezillik baryny eçilýär.  Halkara parahatçylyk we ynanyşmak ýylynda döwrebap sagaldyş we dynç alyş merkezlerinde çagalaryň wagtlaryny has-da gyzykly we täsirli geçirmekleri üçin medeni-köpçülik, sport-bedenterbiýe çäreleri geçirilýär, dürli bäsleşikler guralýar. Türkmenistan döwletimiz bagtly çagalygyň hem-de isleg-arzuwlaryň hasyl bolýan ýurdudyr. Muhammetberdi KUŞIÝEW.

Berkarar döwletiň täze eýýamynyň Galkynyşy döwründe gülleýän, gül açýan ýurdumyz barha özgerýär. Biz milli mirasymyzy dünýä ýaýyp, onuň ähmiýetine, at-owazasyna göz ýetirýäris. Älem gymmatlyklaryndan gözellik paýyny alan türkmen milli lybaslary zenan maşgalanyň görküne görk goşýar. Keteni, çyrpy, kürte ýaly ajaýyp egin-eşikleri gelin-gyzlarymyz akyl-paýhaslary, on barmaklarynyň hünäri bilen döredipdirler.  Ketenim, ýaşlygymyň, juwanlygymyň, gelinligimiň, şöhlesi sende jemlenip duran ýaly. Sen meniň köýneklerimiň içinde iň owadany, iň jadylysy, iň mähribanysyň. Seni göremde mährem enem ýadyma düşýär. Sen meniň ruhy baýdagymsyň, tugumsyň. Gyzyl-gyrmyzy ketenim, sen arzuwlanýan köýnekleriň iň naýbaşysysyň. Sen meniň goragym, söýgimiň özüsiň.  Hawa, toý güni geýen gyzyl ketenime häzirem kir ýokanok, ol ýygyrt hem atanok. Ol sandygymyň düýbünde, ýüregimiň töründe durandyr. Gyzyl gülli sary sähralyga meňzeş ketenim, seni her gezek göresim gelip elime alanymda, ýaşlygym biygtyýar ýadyma düşýär. Ol günler indi gaýtalanmaz, emma könelmezem. Sen ömrümiň baharyny ýatladýarsyň. Belkem, şonuň üçindir senden doýma ýok. Saňa ýetmek üçin gyzlar köp arzuw edýärler. Ketenim, saňa mynasyp bolup, bir ojagyň başyny tutup, ogul-gyz ýetişdirip, olary hem iliň ýagşysyna meňzetmek biziň müdimi borjumyz  bolsa gerek. Ine, keteni köýnegimiz, biz seni mukaddeslik saýyp, ýokarky sözler bilen ýüzlenýäris. Keteni köýnegiň şeýle mukaddesligine haýranlar galýarsyň. Bu çog ýaly gyzyl-gyrmyzy keteniniň  mukaddesligi ölmez-ýitmezdir. Türkmen maşgalasynyň gyrmyzy reňke sarpa goýmagynyň düýp manysy hem şondandyr. Keteni nika köýnegi bolansoň, ony tikmek çem gelen kişä ynanylmaýar. Obada durmuşa çykjak gyzlar halallygy hemra edinen zenanlara toý gününde geýjek ketenisini tikmäge berýärler. Halallyga, ruhy-ahlak päkligine, ynsanperwerlige ýugrulan mukaddes keteni köýnegimiz gözelligiň seresi, görüm-göreldäniň iň uly mekdebi hasaplanylýar.  Bize milli mirasymyzy dünýä ýaýmaga, oňa hormat goýmaga, ýaş neslimizde oňa söýgi oýarmaga döredýän ähli mümkinçilikleri üçin Gahryman Arkadagymyza, Arkadagly Gahryman Serdarymyza il-ýurt bähbitli alyp barýan işlerinde hemişe rowaçlyk arzuw edýäris.    Ogulşat BERKELIÝEWA.

Obada ýaşaýan iki goňşy gelin goh bilen başagaý bolup duruşlaryna, özleriniň ýanlaryna gaýyneneleriniň geleninem duýmadylar. Gelinler gaýynlary gelensoň ýuwaşasalar-da, biri-birine ahmyrly seredişýärdiler. Iki gelniňem gaýyny bulara mylaýymlyk bilen igendi. Aralarynda näme bolandygyny, näme üçin dawalaşýandyklaryny, paýlaşyp bilmeýän zatlarynyň nämedigini soradylar-da, sähel zat üçin şeýdip durmagyň uslyp däldigini aýdyp: — Hi, goňşy bilenem dawalaşyp, durarlarmy? Haý, sizem-ä,   köki  çeşmä                               ýetmişler — diýip, ýakymly käýindiler. Gelinleriň birine çaý demläp getirmegi, beýlekisine çilaradaky güjümiň kölegesine düşek atmagy tabşyrdylar. Hersi öz gelnini ýanynda oturdyp, çaý başynyň gürrüňine geçdiler. Derçiräp çaý içip başlaýyşlaryna gaýynlaryň  ýaşy uluragy: — Goňşy, senem eşidensiň, bilýänsiň. Biziň ýaşlyk ýyllarymyzdan has öňräk durmuşyň nähili agyr, horluk bilen geçendigini. Maňa-da muny ejem pahyr gürrüň beripdi — diýdi-de, derçirän ýüzüni eliniň aýasy bilen sylyp, gürrüňe başlady: — Ol döwürlerde   “Nan — atly,   adamlar — pyýada” diýilýän zamanada ýaşalypdyr. Zähmet gurallary ýönekeý bolansoň, adamlar kyn şertlerde işläpdirler. Adamkärçilik, birek-birege hormat goýmak, sylanyşyklylyk, ynsanperwerlik welin, örän belentde bolupdyr. Goňşular gowy gatnaşyk edipdirler.  Şükür, häzirki döwürde ähli zat eliň aşagynda. Bolçulyk. Bazarlarymyzdan, dükanlarymyzdan islän harydyň tapylyp durandygyny aýtjakmy, tebigy gazy, elektrik toguny isledigiňçe ulanyp bolýandygyny aýtjakmy... Garaz, sanasaň sanap oturmaly. Şular ýaly ajaýyp zamanada ýaşaýandygyňa şükür edip, goňşy bilen süýji gatnaşykda bolnaýmaly ýaly welin, biziň gelinlerimiz ýaly ýek-ýarym goňşy bilen oňuşmaýanlar hem tapylaýýar-da. Göwnüme bolmasa, ýaş goňşularyň arasynda goňşokara gatnaşygy hem peselen ýaly. Ejemiň: “Ýarawsyzlyk tapynyp, birki aý yra-dararak gezenimde, goňşularym öýüň biş-düş, syr-süpür, tamdyra nan ýapmak işleriniň ählisini maňa ýetirmän özleri edipdiler. Hatda mallarymyza çenli seredişipdiler” diýip gürrüň bereni ýadymda” diýenine mähetdel, gaýynlaryň beýlekisi gürrüňe goşuldy: — Geçmişde türkmeniň toýunda-märekesinde uzak ýerden gelen myhmanlaryň rahat dynç almaklary üçin, goňşular olary öýlerine äkidip, hezzet-hormat edipdirler. Bu däp-dessur häli-häzirem dowam edýär.                              Sizem şu gürrüňlerden netije çykaryň! — diýip sözüni soňlady. Gelinler ýüzlerini aşak salyp, bir zatlaryň gürrüňini edip otyrdylar. Bularyň gürrüňi indiden beýläk goňşy bolup agzybir ýaşaşmak, günortanlyk naharyna dograma taýýarlap, goňşular bolup degşip-gülşüp naharlanmak baradady... Şu wakany ýatlanymda goňşy gatnaşyklary baradaky aşakdaky setirler kalbyma doldy: Gowy goňşy kyn günüňde penaňdyr,  Öý-ojagňa, töweregňe galaňdyr, Içiň-daşyň, maşgalaňa söýäňdir, Sen oňa ýaz bolsaň, ol seň güýzüňdir. Goňşyň bilen agzybir bol, käýişme,  Maslahat sal, her tutumda, her işde,  Tötänlikde birden sözüň azaşsa,  Ötünç sora, belki, sebäp özüňdir. Iliň, dogan, garyndaşyň jebisläp,  Toýa başlanyňda arzuwlap, besläp,  Ilki bilen goňşa aýtgyn höwesläp, Ol seniň alawyň hem-de közüňdir. Gybatdan daşda bol goňşy barada,  Goňşy okarany gatnat arada, Goňşyň senden bir maslahat sorasa,  Goldaw berjek seniň jaýdar sözüňdir. Goňşyň begenende senem begengin, Mertebesin belent tutgun, guwangyn,  Goňşyň ynam-ynanjyny gazangyn, Sen gaş bolsaň, goňşyň seniň gözüňdir. Hydyrguly GURBANOW.

Berkarar döwletiň täze eýýamynyň Galkynyşy döwründe hormatly Prezidentimiziň başda durmagynda ýurdumyzyň halkara abraýy barha ýokarlanýar. Türkmen halkynyň Milli Lideri Gahryman Arkadagymyzyň beýik başlangyçlaryny mynasyp dowam edýän Arkadagly Gahryman Serdarymyzyň alyp barýan parasatly içeri hem daşary syýasatynyň netijesinde dünýä döwletleri bilen ykdysady hyzmatdaşlyk,   dost-doganlyk gatnaşyklary ýola goýulýar.  Ýadymyzda bolsa, 2025-nji ýylyň 11-nji aprelinde BMG-niň Baş Assambleýasynyň 79-njy sessiýasynyň 63-nji plenar mejlisinde «BMG-niň deňze çykalgasy bolmadyk ösüp barýan döwletler boýunça üçünji maslahatyny geçirmegiň tertibine goşmaça maglumat» atly Kararnamanyň biragyzdan kabul edilmegi ýurdumyzyň öňe sürýän başlangyçlarynyň dünýä bileleşigi tarapyndan ykrar edilýändiginiň we olaryň halkara giňişliginde uly ähmiýete eýediginiň nobatdaky beýanyna öwrüldi. Şunuň bilen baglylykda, üstümizdäki ýylyň awgust aýynda “Awaza” milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji halkara maslahatynyň geçirilmeginiň meýilleşdirilmegi ýokarda agzanlarymyza doly şaýatlyk edýär. Bu maslahatyň esasy maksady hem deňze çykalgasy bolmadyk ösüp barýan ýurtlaryň ykdysady mümkinçiliklerini artdyrmak, ulag we logistika ulgamlaryny, sebitara we halkara söwda gatnaşyklaryny ösdürmekden hem-de şol ýurtlaryň dünýä ykdysadyýetine doly derejede goşulyşmagyna ýardam bermekden ybarat bolup durýar. Şeýle hem maslahatda ulag geçelgeleri, serhetüsti söwda, energiýa üpjünçiligi, azyk howpsuzlygy, sanly ykdysadyýet we howanyň üýtgemegi ýaly, möhüm meseleler ara alnyp maslahatlaşylar. Forumyň çäklerinde syýasy-diplomatik, söwda-ykdysady, medeni-ynsanperwer ugurly köp sanly çäreleriň guralmagy hem göz öňünde tutulýar.  Halkara maslahatynyň Türkmenistan döwletimizde guralýandygy bilen baglylykda, şol döwürde Merkezi Aziýanyň her bir ýurdunyň “Awazada” öz milli gününi geçirip, özboluşly medeniýetini, sungatyny, milli tagamlaryny görkezmegi hem göz öňünde tutulýar. Bu halkara çäre Türkmenistanyň diňe bir sebitara hyzmatdaşlykda däl, eýsem, dünýä derejesindäki möhüm meseleleriň çözgüdinde hem işjeň hyzmatdaşlygyny görkezýär. Maksat JANMYRADOW.

Berkarar döwletiň täze eýýamynyň Galkynyşy döwrüniň ösüşlere beslenýän Halkara parahatçylyk we ynanyşmak ýylynda bolup geçýän özgertmeler döwlet durmuşynyň ähli ugurlarynyň täze döwrüň talabyna laýyk kämilleşdirilmegini şertlendirýär. Türkmenistanyň kanunçylyk binýadyny halkara kadalaryna laýyk getirmek we ýurdumyzyň ösüşlerini, ykdysady kuwwatyny kämil kanun esasynda berkitmek Arkadagly Gahryman Serdarymyzyň döwlet syýasatynyň esasy ugurlarynyň biri bolmagynda galýar. Hormatly Prezidentimiziň bu babatda öňde goýýan wezipelerinden ugur alnyp, Türkmenistanyň Mejlisiniň ýedinji çagyrylyşynyň şu ýylyň 28-nji iýunynda geçirilen dokuzynjy maslahatynda dürli ugurlara degişli kanunlary kämilleşdirmek boýunça birnäçe kanun taslamalary ara alnyp maslahatlaşyldy we kabul edildi. Maslahatda deputatlar ilki bilen «Türkmenistanyň Raýat kodeksiniň täze beýanyny tassyklamak we herekete girizmek hakynda» Türkmenistanyň Kanunynyň taslamasyny ara alyp maslahatlaşdylar. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, Arkadagly Gahryman Serdarymyzyň durmuşa geçirýän ynsanperwer syýasatyna laýyklykda amala aşyrylýan haýyr-sahawat işiniň kämil hukuk binýadyny emele getirmek maksady bilen, Raýat kodeksine haýyr-sahawat işi bilen baglanyşykly gatnaşyklary kadalaşdyrýan babyň we başga-da birnäçe üýtgetmeleriň girizilmegi aýratyn bellenilmäge mynasypdyr. Kodeksde ulanylýan adalgalara milli kanunçylygymyzyň tejribesine laýyklykda düşünjeler berildi we olaryň mazmuny doly açylyp görkezildi. Şonuň ýaly-da, Kodeksiň bölümleriniň we baplarynyň belgileri, maddalarynyň gurluşy «Hukuk namalary hakynda» Türkmenistanyň Kanunyna laýyklykda görkezildi hem-de Kodeksiň hereket edýän kadalary Türkmenistanyň Konstitusiýasy hereket edýän kanunlar bilen sazlaşykda döwrebaplaşdyryldy. Şeýle hem maslahatda başga-da birnäçe kanun taslamalaryna garaldy we kabul edildi. Türkmenistanda amal edilýän her bir iş döwletimiziň has-da kuwwatlanmagyna, halkymyzyň bagtyýar durmuşda ýaşamagyna gönükdirilendir. Bu işleriň özeninde bolsa, türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň, Arkadagly Gahryman Serdarymyzyň mähriban halkymyza, eziz Watanymyza bolan çäksiz söýgüsi durandyr. Garaşsyz, hemişelik Bitarap Türkmenistan döwletimizde milli kanunçylygymyzy kämilleşdirmekde giň mümkinçilikleri we şertleri döredip berýän Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak bolmagyny, dünýä ähmiýetli alyp barýan işleriniň rowaç almagyny arzuw edýäris.   Orazdurdy ABDYÝEW.

Golaýda “Mary” myhmanhanasynyň mejlisler zalynda Türkmenistanyň Demokratik partiýasynyň welaýat, Mary şäher, Mary, Wekilbazar, Murgap etrap komitetleriniň bilelikde guramagynda “Ýaşasyn parahat durmuş!” atly maslahat geçirildi. Oňa welaýat, şäher, etrap halk maslahatlarynyň agzalary, TDP-niň welaýat, Mary şäher, Mary, Wekilbazar, Murgap etrap komitetleriniň işgärleri we işjeň agzalary gatnaşdylar. Maslahaty TDP-niň welaýat komitetiniň guramaçylyk we syýasy işler bölüminiň müdiri Myrat Ataýew açdy we alyp bardy. Maslahatda TDP-niň Mary şäher komitetiniň başlygy Hekimberdi Orazberdiýew, TDP-niň Wekilbazar etrap komitetiniň başlygy Tawus Gylyjowa, TDP-niň Ýolöten etrap komitetiniň partiýa guramaçysy Şasenem Röwşenowa, welaýat taryhy we ülkäni öwreniş muzeýiniň Murgap etrap şahamçasynyň ýolbaşçysy, TKA-nyň işjeň agzasy Sytdyh Rahmanow, Mary etrabyndaky 8-nji orta mekdebiň mugallymy, TDP-niň welaýat komitetiniň ýanyndaky wagyz-nesihat toparynyň agzasy Muhammetmyrat Allakulyýew, Mary şäheriniň merkezi şäher kitaphanasynyň kitaphanaçysy, TDP-niň welaýat komitetiniň ýanyndaky wagyz-nesihat toparynyň agzasy Maral Gulowa çykyş etdiler. Olar çykyşlarynda Garaşsyz, Bitarap Türkmenistan döwletimizde halkymyzyň asuda, abadan durmuşda bolelin ýaşamagy üçin döredilip berilýän mümkinçilikler barada giňişleýin gürrüň etdiler. Şeýle hem gözel Diýarymyzda hemişelik Bitaraplygymyzyň 30 ýyllygynyň baýramyny dabaraly bellemäge görülýän taýýarlyk dogrusynda nygtadylar. Maslahatyň ahyrynda bagtyýar türkmen halkyny nurana geljege alyp barýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, tutýan tutumly işleriniň rowaç bolmagy arzuw edildi. Şemşat SAÝLYÝEWA.

Türkmenistanyň Prezidentiniň durnukly ösüşi üpjün etmäge gönükdirilen daşary syýasatyny durmuşa geçirmek hem-de halkara we sebit derejesinde kabul edilen resminamalary iş ýüzünde amala aşyrmak, şeýle hem Birleşen Milletler Guramasy bilen hyzmatdaşlykda Deňze çykalgasy bolmadyk ösüp barýan ýurtlar boýunça üçünji maslahaty guramaçylykly geçirmek maksady bilen, Türkmenistanyň Prezidenti Karara gol çekdi. Resminama laýyklykda, 2025-nji ýylyň 4 — 8-nji awgusty aralygynda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan ýurtlar boýunça üçünji maslahatyny we ugurdaş çäreleri guramaçylykly hem-de ýokary derejede geçirmek bellenildi. (TDH)

Parahatçylyk we ynanyşmak adamzadyň abadan geljegini üpjün etmekde biri-biri bilen aýrylmaz baglanyşykly gymmatly düşünjelerdir. Şonuň üçinem hormatly Prezidentimiziň alyp barýan öňdengörüjilikli daşary syýasaty dünýäde parahatçylygy, ynanyşmagy we hyzmatdaşlygy pugtalandyrmagyň ýörelgesine eýerýändigi bilen adamzat jemgyýetçiliginde uly gyzyklanma döredýär. Türkmenistanyň başlangyjy bilen BMG-niň Baş Assambleýasynyň kabul eden Kararnamalarynyň üçüsi bilen ykrar edilen hemişelik Bitaraplygymyzyň taryhy ähmiýeti uludyr. Bitaraplygymyzyň 30 ýyllygynyň uly toýy Halkara parahatçylyk we ynanyşmak ýylynyň şanyna şan goşar. Garaşsyz döwletimiziň Bitaraplyk hukuk derejesinden ugur alyp öňe sürýän halkara ähmiýetli başlangyçlaram dünýä jemgyýetçiliginiň ünsüni özüne çekýär we içgin öwrenilýär. Mysal üçin, geçen ýylda Türkmenistanyň başlangyjy esasynda BMG-niň Baş Assambleýasy tarapyndan “2025-nji ýyl — Halkara parahatçylyk we ynanyşmak ýyly” hem-de “Merkezi Aziýa — parahatçylyk, ynanyşmak we hyzmatdaşlyk zolagy” atly Kararnamalaryň Milletler Bileleşigine agza döwletleriň biragyzdan goldamagynda kabul edilmegi möhüm waka boldy. Munuň özi ýurt Baştutanymyzyň parasatly daşary syýasatynyň rowaç alyp, uly goldawa eýe bolýandygyna aýdyň subutnamadyr.  Hormatly Prezidentimiziň hoşniýetli, parahatçylyksöýüjilikli daşary syýasat strategiýasy giň gerime eýe bolýar. Bütin dünýäde ählumumy howpsuzlygy berkidip, parahatçylykly gatnaşyklarda özara bähbitli hyzmatdaşlygy ösdürmäge ýardam edýär. Bu bolsa, durnukly ösüşi, abadançylygy, rahat durmuşy kepillendirýär. Laçyn KAKAJANOWA.

Türkmen halky hormatly  Prezidentimiziň baştutanlygynda Halkara parahatçylyk we ynanyşmak ýylymyzyň ýene bir guwançly senesi — hemişelik Bitaraplygymyzyň 30 ýyllygynyň toýuna taýýarlyk görýär. Bu senäniň ähmiýeti örän uludyr. Türkmen halky özüniň eşretli ertirki gününi, döwletli döwranyny baky Bitaraplygymyz bilen aýrylmaz baglanyşdyrýar. Sebäbi Garaşsyz, baky Bitarap Türkmenistanymyz bu günki günde parahatçylygyň we asudalygyň, agzybirligiň we jebisligiň ýurdy hökmünde bütin dünýäde tanalýar. Türkmen Bitaraplygynyň 30 ýyla golaý döwrüniň içinde ata Watanymyz tanalmaz derejede ösdi we özgerdi. Bilşimiz ýaly, ak şäherimiz Aşgabat sebitde ylalaşdyryjy merkeze öwrüldi. Arkadagly Gahryman Serdarymyzyň baştutanlygynda ýurdumyzda tutuş adamzadyň bähbidine hyzmat etjek oňyn teklipler yglan edilip, olar dünýä jemgyýetçiliginde uly goldawa eýe bolýar. Garaşsyz Türkmenistanymyzyň Bitaraplygynyň geçen 30 ýyla golaý döwründe ýurdumyzyň diňe bir daşary syýasatynda däl, eýsem, içeri syýasatynda-da, durmuş-ykdysady ösüşlerinde-de, medeni-ruhy gatnaşyklarynda-da beýik işler durmuşa geçirildi.  Ogulşeker DURDYÝEWA.

Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda Garaşsyz, Bitarap döwletimiz ösüş-özgerişleriň aýdyň ýoly bilen ynamly öňe barýar. Türkmen halkynyň Milli Lideri Gahryman Arkadagymyzyň Türkmenistan Watanymyzy çalt depginlerde ösdürmäge gönükdirilen beýik başlangyçlaryny üstünlikli dowam edýän   hormatly   Prezidentimiziň parasatly baştutanlygynda belent sepgitlere eýe bolunýar. Ýurdumyzy durmuş-ykdysady we medeni taýdan durnukly ösdürmekde uly üstünlikler gazanylýar. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň taýsyz tagallalary bilen mähriban Watanymyzyň gülläp ösmeginde giň möçberli işler durmuşa geçirilýär. Aşgabat — Türkmenabat ýokary tizlikli awtomobil ýolunyň gurluşygynda uly işler bitirildi we bitirilýär. Ilatyň saglygyny goramakda alnyp barlýan işler hem giň gerime eýe boldy.  Gahryman Arkadagymyzyň beýik başlangyçlaryndan gözbaşly döwlet ähmiýetli, il-gün bähbitli tutumly işleriň bady artýar. Şeýle işlere mysal edip, türkmen halkynyň Milli Lideri Gahryman Arkadagymyzyň başlangyjy bilen gurluşygynyň birinji tapgyry tamamlanan Arkadag şäherini ýatlasak ýakymlydyr. Gojaman Köpetdagyň ajaýyp dag   eteginde gurlup, birinji tapgyrynyň gurluşyk-gurnama işleri tamamlanan Arkadag şäheri nusgalyk şäherdigi bilen  dünýä doldy. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň başlangyjy esasynda gurluşygyna girişilen bu örän iri taslamany durmuşa geçirmegiň çäklerinde 2023-nji ýylyň iýun aýynda hormatly Prezidentimiziň gatnaşmagynda Arkadag şäheriniň birinji tapgyrynyň ulanylmaga berilmegi taryhy waka boldy.  Gahryman Arkadagymyz bu döwrebap şäheriň gurluşygyny hemişe üns merkezinde saklap, bu döwletli iş üstünlikli dowam etdirilýär. Şeýle tagallalaryň netijesinde, bu şäher  “akylly” şäher ady bilen meşhurlyga eýe boldy. Dogrusy, Arkadag şäheri maksatlaryň myrat bolýan jenneti mekanyna öwrüldi. Häzirki wagtda Arkadag şäheriniň gurluşygynyň ikinji tapgyry güýçli depginde dowam etdirilýär. Türkmen halkynyň Milli Lideri  Gahryman Arkadagymyzyň taýsyz tagallalary, egsilmez yhlasy netijesinde sanlyja ýyllarda kemala gelen bu döwrebap şäheriň  halkara sylaglarynyň ençemesine mynasyp bolmagy-da   Gahryman Arkadagymyzyň tagallalarynyň miwesidir. Türkmen halky ýokary zähmet üstünliklerine beslenip, şanly wakalary bilen şöhratlanýan Halkara parahatçylyk we ynanyşmak ýylynda tutanýerli zähmet çekýär. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň peder ýoluny dowam edýän Arkadagly Gahryman Serdarymyzyň baştutanlygynda Garaşsyz, baky Bitarap döwletimiz ynamly gadamlar bilen aýdyň geljegine barýar. Baýram AMANOW.

23-nji iýunda hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy. Sanly ulgam arkaly geçirilen iş maslahatynyň dowamynda ilki bilen welaýatlaryň häkimleri özleriniň ýolbaşçylyk edýän sebitlerinde häzirki günlerde alnyp barylýan işler barada hasabat berdiler.  Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi. Bellenilişi ýaly, sebitde ýetişdirilen bugdaý hasylyny ýygnap almak, bu ugurda oba hojalyk tehnikalaryny, galla kabul ediş kärhanalaryny doly güýjünde işletmek, önüm öndürijiler bilen tabşyrylan hasyl üçin hasaplaşyklary öz wagtynda geçirmek boýunça zerur çäreler görülýär. Gowaça ekilen meýdanlarda hatarara bejergi, mineral dökünler bilen iýmitlendirmek, ösüş suwuny tutmak işleri talabalaýyk alnyp barylýar. Welaýatda ýazlyk ýeralmanyň, gök-bakja ekinleriniň ýetişdirilen hasylyny ýygnap almak, bu önümleri ilata ýetirmek babatda zerur çäreler görülýär. Gant şugundyrynyň ekişi hem dowam edýär. Şeýle-de häkim ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna, Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleriniň barşy barada hasabat berdi. Hormatly Prezidentimiz hasabaty diňläp, ýetişdirilen bugdaý hasylynyň ýitgisiz ýygnalyp alynmagyny, galla oragynyň depgininiň güýçlendirilmegini, gowaça meýdanlaryndaky ideg işleriniň agrotehniki möhletlerde we talabalaýyk geçirilmegini esasy wezipeleriň hatarynda belledi hem-de häkime birnäçe anyk tabşyryklary berdi. Döwlet  Baştutanymyz ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, welaýatda şu ýyl açylyp ulanmaga berilmegi meýilleşdirilen medeni-durmuş, önümçilik maksatly desgalardaky gurluşyk işleriniň ýokary hilli ýerine ýetirilmegini gözegçilikde saklamagy hem tabşyrdy. Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi. Hormatly Prezidentimiz hasabaty diňläp, oba hojalyk pudagyny yzygiderli ösdürmek, önümçilikde ýokary görkezijileri gazanmak üçin toplumlaýyn çäreleriň görülmeginiň zerurdygyny belledi we wise-premýere ýurdumyzyň ekerançylyk meýdanlarynda dowam edýän agrotehniki çäreleriň, hususan-da, galla oragynyň talabalaýyk, guramaçylykly geçirilmegini gözegçilikde saklamagy tabşyrdy. Soňra döwlet Baştutanymyz iş maslahatyna gatnaşyjylara ýüzlenip, galla oragynyň batly depginde alnyp barylýandygyny nygtady we bugdaý hasylyny soňky dänesine çenli ýygnap almak üçin zerur çäreleri görmegi tabşyrdy. Şeýle hem hormatly     Prezidentimiz oba hojalyk pudagynyň öňünde durýan möhüm wezipelere ýene-de bir gezek ünsi çekip, ekinlere ideg etmekden başlap, ýetişdirilen hasyly ýygnap almak işlerine çenli oba hojalyk önümçiliginiň ähli tapgyrlarynda işleriň ýokary hilli ýerine ýetirilmegini üpjün etmegi tabşyrdy. TDH-niň habary esasynda taýýarlanyldy.

Golaýda Wekilbazar etrap medeniýet öýünde TDP-niň, TAP-nyň etrap komitetleriniň, TMÝG-niň etrap geňeşiniň, etrap polisiýa bölüminiň, etrap bilim bölüminiň, etrap merkezi kitaphanasynyň bilelikde guramagynda «Maşgala mukaddesligi halkymyzyň milli terbiýesiniň gönezligidir» ady bilen wagyz-nesihat duşuşygy geçirildi. Duşuşyga ýokarda ady agzalan syýasy partiýanyň we jemgyýetçilik guramalarynyň işgärleri, etrap polisiýa, bilim bölümleriniň wekilleri, kitaphanaçylar gatnaşdylar.  Duşuşykda TDP-niň etrap komitetiniň başlygy Tawus Gylyjowa, TAP-nyň etrap komitetiniň hünärmeni Täzegül Gurdowa, TMÝG-niň etrap geňeşiniň esasy hünärmeni Hajar Garryýewa çykyş etdiler. Çykyş edenler ata-babalarymyzdan gelýän milli ýörelgelerimiz, maşgala mukaddesligi, zenan mertebesi hakynda giňişleýin gürrüň etdiler.  Mähri ANNAÝEWA.

Bahar paslynyň ajaýyp gözelligi

Fotoreportaj: Futbol boýunça Türkmenistanyñ çempionaty 12-nji tapgyr Altyn Asyr - Merw

Fotoreportaj: Futbol boýunça Türkmenistanyñ çempionaty Merw 1-1 Altyn Asyr

Fotoreportaž: Mary welaýaty: Çagalary goramagyň halkara güni mynasybetli geçirilen dabaralardan pursatlar

Fotoreportaž: Mary welaýatynda Bütindünýä welosiped güni bellenilip geçildi.

Fotoreportaž: Mary welaýaty: Türkmenistanyň ÝUNESKO agzalygyna kabul edilmeginiň 30 ýyllygyna bagyşlanan dabaralardan pursatlar.

Fotoreportaj: DÇ-2026 saýlama tapgyry Türkmenistan 0-1 Eýran yslam respublikasy

Fotoreportaj: Mary şäheriniň Çagalar çeperçilik mekdebiniň okuwçylarynyň işleri